Charter Document - 02340090
| Charter Number: | 02340090 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1036 |
| Date type: | Internal, Regnal |
| Resource Link(s): |
|
Charter:
In nomine sancte et individue trinitatis ego Rainaldus comes cogitans de remedio anime mee vel parentum meorum tam defunctorum quam vivorum maximeque filii mei Othonis destinavi aliquam portiunculam de rebus jure hereditario michi a predecessoribus meis relictis dare ad locum beati archangeli Michaelis ubi supradictus filius meus Otho requiescere videtur eo tenore ut monachi ejusdem monasterii omni anno anniversarium diem jam dicti filii mei cum omni honore tam signa sonando quam cetera officia mortuis impendendo persolvere non negligant simulque omni tempore tam pro me quam pro uxore mea Herviz seu filio nostro Arduyno ac filia Ermengarda psalmum unum in ecclesia decantent Igitur una cum consensu supradicte uxoris mee ac filii vel filie quidquid in Pimella villa habere videor cum omni integritate absque ulla diminutione vel detractione servos et ancillas terras cultas et incultas silvas prata aquas aquarumque decursus exquisita et inquirenda ad jam nominatum locum trado dono ac de meo jure in ejus dominationem transfundo ita ut ab hac die liberam habeant monachi supra dicti loci potestatem et facultatem quidquid ex inde facere voluerint vendendi donandi mutandi Similiter quidquid in villa Curceyeo possideo legali donatione ad supra dictum locum trado ea ratione ut post discessum Gosmari cujusdem fidelis nostri absque ulla contradictione cum omni integritate prefati monachi recipiant ac jure hereditario in perpetuum possideant Dono etiam ad jam denominatum locum in villa Monasteriolo mansum unum cum omnibus appendiciis suis et capellam que in ea sita est sed vetustate dirutam eo tenore ut jam dicti monachi eam reedificare studeant et in perpetuum absque ulla calumpnia possideant Trado etiam in eadem villa servum unum nomine Ingelbertum cum uxore et liberis suis Hec omnia sicut jam dictum est ea ratione ad supra dictum locum absque ullius contradictione dono ut pro me et pro uxore mea et liberis nostris omni tempore Deum deprecentur et post obitum nostrum pro animabus nostris intercessores existant Si quis autem heredum meorum vel quorumcumque hominum hanc donationem calumniare ausus fuerit non solum quod cupit non obtineat sed insuper viginti libras auri supradicto loco componat et eternam maledictionem [nisi resipuerit et satisfecerit] incurrat Et ut hec nostra traditio stabilis et inconvulsa permaneat manu propria subter firmavi testibusque corroborandam tradidi Signum Rainaldi comitis qui hanc donationem firmavit Arduini qui firmavit et firmare rogavit Erviz matris ejus Ermengarde sororis ejus Ervei Widonis Hugonis Barnuynis Wydonis Emelini Iterii Widrici Rotberti clerici Hugonis Rodulfi Attonis Raynaldi Rotberti pueri Widonis pueri Raynardi pueri Richardi Otmundi Attoni Joffredi Otmundi Aymonis Millonis clerici Raynaldi comitis Willelmi comitis filii ejus Actum Tornodori castri publice mense julio anno V regni regis Henrici incipiente