Charter Document - 02340075
| Charter Number: | 02340075 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 0974 |
| Date type: | Internal, A.D., Regnal |
| Resource Link(s): |
|
Charter:
In nomine sancte et individue trinitatis Lotharius divina proficiente clementia Francorum rex Si petitionibus servorum Dei justis et rationabilibus divini cultus amore favemus digne retributionis premio nos a Domino remunerari fideliter credimus Idcirco noverit omnium fidelium nostrorum tam presentium quam et futurorum solertia quia venerabilis dux Burgundie Henricus nostram adiens presentiam detulit auribus nostris quia monachi de monasterio Sancte Columbe virginis et martyris Christi in quo ipsius et sancti Lupi confessoris Christi corpora humata venerantur preceptum domni Ludovici bone memorie piissimi augusti habuissent de foresta regia que est in Igauna flumine non longe a Senonensi urbe Sed idem monasterium ignis vastavit incendium et eandem auctoritatem cum multis aliis ornamentis ecclesie amiserunt Ob firmitatem tamen rei postulavit nos predictus dux Henricus ut paternam auctoritatem propter reverentiam memoratorum sanctorum et eterne retributionis fructum concederemus Cujus petitioni libenter annuentes concedimus eidem monasterio ipsam forestam videlicet a loco qui vocatur Capetum usque ad Duliacum villam sicut in auctoritate domni piissimi Ludovici augusti continebatur Precipientes quoque jubemus ut nullus judex publicus vel alia cujuslibet potestatis predita persona monachos in ipso monasterio degentes de jam dicta foresta inquietare audeat vel ullum quod libet instrumentum ad pisces capiendos in ea quilibet hominum construere audeat sed cujuscumque sint littora prefato monasterio aquam cum omni piscatione et cum justitia sub immunitatis nostre defensione quieto ordine pro eterna remuneratione possidere concedimus quatenus ipsos monachos qui ibidem Deo famulantur pro nobis et conjuge proleque nostra atque stabilitate totius imperii nostri a Deo nobis concessi ejusque clementissima miseratione per immensum conservandi jugiter Domini misericordiam exorare delectet Hanc itaque auctoritatem ut pleniorem in Dei nomine obtineat vigorem et a fidelibus sanctce Dei ecclesie et nostris et ut verius credatur et diligentius conservetur manu propria subter firmavimus et anuli nostri impressione signari jussimus Actum Compendio palatio regio anno Dominice Incarnationis DCCCCLXXIV regnante domno Lothario gloriosissimo rege anno XXI Signum domni Lotharii gloriosissimi regis Ego Adalbero regius notarius ad vicem domni Adalberonis Remorum archiepiscopi et summi cancellarii recognovi