Charter Document - 02340067

In nomine sancte et individue trinitatis Karolus divina propitiante clementia rex Si locis divinis cultibus mancipatis beneficia oportuna largimur aut abstracta reddimus et restauramus id nobis proculdubio ad presentem vitam facilius transigendam et eternam felicius capessendam nos adesse confidimus Quapropter notum esse volumus cunctis fidelibus sancte Dei ecclesie et nostris presentibus scilicet atque futuris quoniam nos de eterna cogitantes remuneratione et gloriosi avi nostri pie memorie Karoli imperatoris ac genetoris nostri domni Hludovici regis animarum remedio quandam villam que vocatur Crevennus sitam in pago Autissiodorensi super fluvium Icaune per deprecationem dilecti ac carissimi nostri Richardi venerabilis comitis sancte matri ecclesie Autissiodorensis in honore beatissimi Christi martyris Stephani fundate atque rectori ejus Herifrido dilecto ac venerabili nobis episcopo reddimus et restauramus atque perpetualiter confirmamus Ipsa autem villa eidem matri ecclesie olim abstracta propter vestituram nonas et decimas persolvere hospitali ipsius annis singulis visa est Unde hoc nostre celsitudinis preceptum fieri jussimus ac prefato venerabili episcopo Herifrido dedimus per quod prefatam villam Crevennum cum omnibus integritatibus et appenditiis suis hoc est in Vermentonno mansa quatuor in Boxonte mansum unum in Valeria mansum unum in Germiniaco mansa XII cum vicaria Tauriacensi et cum ecclesia in honore beati Petri principis apostolorum constructa cum terris cultis et incultis vineis silvis pratis pascuis molendinis aquis aquarumve decursibus exitibus et regressibus et omnibus legitimis terminationibus ac mancipiis utriusque sexus desuper commanentibus vel ibidem aspicientibus Prefate ecclesie memoratus pontifex ac successores ipsius jure firmissimo perpetualiter teneant atque possideant sicut alias res ipsius ecclesie nemine inquietante sed et successores nostros obnixe poscimus ut hanc nostram restaurationem congruo in futurum loco eveniente ob amorem Dei sanctique Stephani ratam et stabilem esse permittant sicut sua statuta stabilia permanere desiderant Ut autem hoc nostre auctoritatis preceptum ampliorem in Dei nomine obtineat firmitatis vigorem manu propria subter illud firmavimus et anuli nostri impressione insigniri jussimus Signum Karoli gloriosissimi regis + Erluinus notarius ad vicem Askerici episcopi recognovit et subscripsit + Datum anno VIII regnante domno Karolo gloriosissimo rege redintegrante III Actum Compendio palatio