Charter Document - 02340065

In nomine domini Dei eterni et Salvatoris nostri Jesu Christi Odo clementia Dei rex Si utilitatibus locorum divinis cultibus mancipatorum servorumque Dei necessitatibus in iisdem degentium opem nostre celsitudinis impendimus regium procul dubio [exercemus morem] ac per hoc ad eternam beatitudinem capessendam omnino venturos nos minime dubitamus Quare notum esse volumus omnium sancte Dei Ecclesie fidelium nostrorumque presentium scilicet et futurorum industrie quod adiens genua serenitatis nostre coram frequentia procerum primatumque nostrorum Robertus venerabilis comes consentiente reverentissimo comite et abbate Richardo humiliter petiit ut quibusdam postulatibus monachorum monasterii Sancte Columbe virginis et Sancti Lupi confessoris quod est constructum in suburbio Senonensi assensum preberemus Quod ita [fecimus et] ut normam sui propositi liberius observarent et pro statu regni nostri ac nostris relaxandis piaculis divinam valeant clementiam exorare omni tempore habendam eis concessimus aream intra muros civitatis constitutam ad ecclesiam et edificia illis necessaria edificanda que habet de uno latere a claustro canonicorum usque ad portam Sancti Desiderii per murum perticas XXXV et dextrum de alio latere perticas XXXI de una fronte que est ad portam Sancti Desiderii perticas XVIII et dimidiam ex alia fronte perticas XV per medium in transverso perticas XII et dimidiam et foris civitatem de terra que fuit vinea indominicata ad eandem pertinente anzingas XII Statuimus etiam pro Dei amore et sanctorum ejus veneratione atque monachorum congrua utilitate et imminenti necessitate posternam ad prefatam aream pertinentem semper habere apertam que iter secretius eis ad monasterium prebeat et totius substantie intus mittendi aut foras expellendi aditum absque cujuslibet contradictione tribuat Et quia sanctorum Patrum decreta et antecessorum nostrorum statuta monachorum vitam in omni quiete degere censuerunt constituimus atque ita in perpetuum manere censemus ut neque abbas neque episcopus nec comes neque ulla judiciaria aut cujuscumque dignitatis vel potestatis persona ullo unquam tempore aliquod impedimentum in supradicta area commanendi aut commorandi vel cujuscumque rei negotium peragendi [causa] facere presumat manente sub eadem auctoritate jam dicta posterna ut nullus ab eis prescriptam valeat de ea auferre potestatem Itemque decernimus ut nullus judex eis contradicere possit de omni substantia sua quidquid eis visum fuerit necessarium et sint remoti ab omni inquietudine populari ut valeant pacifice Domino famulari Ut autem hoc preceptum nostre auctoritatis inviolabile sit et sempiternum in Omnipotentis nomine obtineat vigorem diuturnisque valeat temporibus durare manu propria subter firmavimus atque annuli nostri impressione insigniri jussimus Signum Odonis gloriosissimi regis Troannus notarius ad vicem Eblonis recognovit Datum XVI kalend julii indictione IX anno IV regnante domno Odone gloriosissimo rege Actum apud Vermeriam palatium in Dei nomine feliciter Amen