Charter Document - 02340063

In nomine sancte et individue trinitatis Odo clementia Dei rex Si sacerdotibus in quibuslibet necessitatibus ecclesiasticis nostra auctoritate sublevandis consulimus et ad ministerium suum liberius exequendum opem ferimus a summo pontifice Domino nostro Jesu Christo eterne remunerationis largiri nobis premia non ambigimus Quapropter notum sit omnibus sancte Dei Ecclesie fidelibus et nostris presentibus scilicet et futuris quia Argrinus sancte Lingonice ecclesie reverendus antistes nostram adiens celsitudinem obtutibus nostris precepta et auctoritates regum scilicet et imperatorum nostrorum videlicet antecessorum obtulit Ludovici nempe imperatoris et Caroli filii ejus nihilominus imperatoris necnon et Caroli nepotis illius similiter imperatoris aliorumque regum qualiter ipsi abbatias castra villas aliasque diversarum rerum possessiones jam dicte ecclesie Lingonice delegaverunt et ablata reddiderunt atque ut ibi perpetuo permanerent sua auctoritate confirmaverunt munitionem videlicet Lingonice civitatis ubi habetur ecclesia in honore beati Mammetis eximii martyris et castrum Divionense in quo sita est ecclesia in honore Sancti Stephani protomartyris et juxta monasterium Sancti Benigni cum omni eorum integritate et in pago Tornotrense monasterium Melundense et in eodem pago castrum Tornotrense caput videlicet comitatus et abbatiolam Sancti Symphoriani in Ladiniaco cum ecclesiis aliisque rebus sibi aspicientibus et intra muros jam dicte Lingonice civitatis abbatiam Sancti Petri et juxta eamdem civitatem monasterium sanctorum Geminorum cum omnibus sibi competentibus et in pago Atoariorum monasterium Besuense cum omni sua integritate sive etiam alias abbatiolas aliarumque diversarum rerum possessiones quales eadem Lingonensis ecclesia juste et legaliter quieto ordine obtinere videtur Obtulit etiam et immunitates et auctoritates ex castello Barro scilicet et Magno Monte necnon et ex mercatis et monetis qualiter a supradictis antecessoribus nostris confirmate fuissent et supradicte ecclesie delegate et ad jus illius rectorumque ejus ordinationem perpetuo absque alicujus judicis inquietudine pertinere debuissent Hujus itaque rei causa ad nostram se colligens majestatem humiliter deprecatus est quatinus pro Dei omnipotentis amore et supra memoratorum sanctorum obventu ex his omnibus supra memoratis vel etiam ex iis que futuris temporibus a Deum timentibus aliquando eidem ecclesie restituentur tale auctoritatis nostre preceptum facere juberemus per quod hec eadem ecclesia supra memorata absque alicujus inquietudine in Dei nomine obtinere valeret Cujus nos saluberrimis postulationibus aurem nostre serenitatis accommodantes ad deprecationem Askerici venerabilis episcopi necnon et ob amorem supra memorati Argrini episcopi hoc precepti nostri edictum fieri jussimus per quod statuentes decernimus et ex nostra regali auctoritate confirmamus ut quemadmodum supra memorata monasteria abbatie aliarumque rerum possessiones monete etiam castella atque mercata insuper et omnia que jam dicta ecclesia juste et legaliter obtinere videtur necnon et ex monetis mercatis atque castellis sicut ab antecessoribus nostris regibus scilicet et imperatoribus ordinatum est sic absque alicujus inquietudine seu temeraria presumptione aut repetitione seu diminutione seu etiam et comitum vel judicum presumptiva occasione hec eadem Lingonensis ecclesia obtineat atque per futura tempora quieto ordine possideat Similiter namque per hanc precepti nostri auctoritatem ex immunitatibus ejusdem ecclesie decernendo sancimus ut nemo fidelium nostrorum vel quilibet ex judiciaria potestate in ecclesias agros vel loca sive reliquas possessiones a rectoribus ipsius ecclesie legaliter possessas et per auctoritatem antecessorum nostrorum postea ad partem ipsius ecclesie confirmatas [quas] in quibuslibet locis vel territoriis infra ditionem totius regni nostri eadem memorata tenet vel possidet ecclesia vel eas que deinceps a catholicis viris eidem collate fuerint ecclesie ad causas audiendas aut freda vel tributa exigenda aut mansiones vel paratas faciendas aut fide jussores tollendos aut homines ipsius ecclesie tam ingenuos quam servos super terram ipsius commanentes distringendos nec ullas redhibitiones aut illicitas occasiones requirendas nostris et futuris temporibus ingredi audeat vel ea que supra memorata sunt exigere penitus presumat sed liceat memorato presuli suisque successoribus res predicte ecclesie cum omnibus sibi pertinentibus sub immunitatis nostre defensione quieto ordine possidere et nobis fideliter deservire atque pro stabilitate nostra vel totius regni a Deo nobis collati vel conservandi una cum clero et populo sibi subjecto libere Dei misericordiam exorare Et quicquid exinde fiscus noster exigere debet ad integrum predicte ecclesie concedimus ut perpetuis temporibus ibidem proficiat in augmentum Et ut hoc nostre auctoritatis edictum pleniorem inviolabilemque obtinere valeat firmitatis per futura tempora vigorem manu propria subter firmavimus atque annuli nostri impressione insigniri jussimus Signum Odonis gloriosissimi regis Throannus notarius ad vicem Eblonis recognovit et subscripsit Datum XIX kalend januarii indictione VII anno incarnationis Dominice DCCCLXXXIX anno secundo regnante domino Odone gloriosissimo rege Actum Lauduno Clavato in Dei nomine feliciter