Charter Document - 02340052

In nomine sancte et individue trinitatis Karolus ejusdem Dei omnipotentis misericordia imperator augustus Si servorum Dei justis postulationibus aurem nostre serenitatis accommodamus easque ad effectum pie petitionis prosperande perducimus profuturum nobis hoc ad presentem vitam felicius obtinendam fore nullatenus dubitamus Quocirca noverit omnium sancte Dei ecclesie fidelium nostrorumque tam presentium quamque futurorum sollertia quoniam quidam ex monachis ex cenobio Sancti Germani Autisiodorensis adierunt excellentiam nostre celsitudinis innotescentes serenitati nostre qualiter quidam noster fidelis Adelbertus nomine allodium suum quod constat in finibus comitatus Senonici et est in villis Rivisiaco et Sarmasia supra fluvium Sedono eidem cenobio liberalitatis munificentia per cartarum instrumenta contulisset abbas vero memorati cenobii et reliqui fratres ipsum allodium jure beneficiario et usu fructuario eidem Adelberto denuo conferre studuerunt sed post hec ob illius negligentiam in fiscum nostrum decidit et in jus ac dominationem nostram legaliter devenit Et quia prefato cenobio non aliter legitime postquam in fiscum nostrum deciderat reddi poterat nisi per preceptum nostre auctoritatis libuit serenitati nostre hoc altitudinis nostre preceptum fieri et jam dicto cenobio dari per quod precipimus atque jubemus ut ita prefatum allodium stipendiis fratrum a nobis deputatum ita quiete teneat atque possideat absque alicujus inquietudinis impulsu sicut reliquas res olim a fidelibus christianis antiqua munificentia sibi collatas Ut autem hujus nostre auctoritatis preceptum pleniorem in Dei nomine firmitatis obtineat vigorem manu nostra illud firmavimus atque anuli nostri impressione subter jussimus sigillari Datum nonis maii indictione X anno XXXVII regni domni Karoli imperatoris in Francia et imperii ejus anno secundo Actum Compendio monasterio in Dei nomine feliciter Amen