Charter Document - 02340050

In nomine sancte et individue trinitatis Karolus gratia Dei rex Si locis divinis cultibus mancipatis munimen regie celsitudinis exhibemus profuturum nobis ad presentem vitam felicius transigendam et ad futuram beatitudinem facilius obtinendam non dubitamus Noverit igitur sancte Dei ecclesie nostrorumque presentium et futurorum industria quia divina inspirante clementia complacuit serenitati nostre ob genitoris genitricisque nostrorum necnon et anime nostre conjugis ac prolis remedium dare Arnulfo venerabili abbati ac congregationi sibi commisse ob restaurationem loci et beati Martini amorem in pago Avalensi capellam que est in honore beati Martini que sita est in villa Avalone cum omni re ad se pertinente et in eodem pago in alio loco villam Garillas cum duabus capellis et omni re ad se pertinente et in alio loco villam Uldunum cum omni re ad se pertinente et in comitatu Tornodrensi capellam unam in honore S Juliani cum duobus mansis et in eodem comitatu in alio loco mansos XV cum omnibus rebus ad se pertinentibus et in pago Dusmense et Alsense Stolmarum [Estormer] cum duabus ecclesiis et omnibus ad se pertinentibus et in comitatu Trecacense mansos XV cum omni re ad eosdem aspiciente et in comitatu Cabillonense in villa Canabas mansos XIII quos Berterius habuit et beneficium quod Gotthodeus habuit inter diversa loca mansos C quinquaginta Hec omnia jam dicto Arnulfo venerabili abbati suisque successoribus gregique sibi commisso perpetualiter largiendo concedimus Unde etiam hoc altitudinis nostre preceptum fieri illique dari jussimus per quod ipse suique successores memoratas res absque ullius contradictionis inquietudine perpetuum tenendo possideant Quin etiam statuimus in hoc precepto inferendum quod nuper beato Martino et prefato concessimus abbati ad locum restaurandum et fratrum necessaria complendum villam scilicet Porcariorum que est in pago Bituricensi cum omni re ad se pertinente et in eodem pago Columbarium villam cum omni re ad se pertinente et in pago Aurelianense villam que dicitur Pinus cum omni re ad se pertinente et in eodem pago inter villam Roborem et villam Pinus mansos VIII Denique hec omnia seu supradicta memorato cenobio etiam dicto abbati suisque successoribus perpetuo cedimus ad habendum et indissolubiliter delegamus ad possidendum Ut autem hec nostre munificentie largitio firmior habeatur et inviolabilius per futura tempora conservetur manu propria eam firmavimus atque nostri annuli impressione subter jussimus sigillari Abbo presbyter ad vicem Gauzleni recognovit Signum Karoli gloriosissimi regis Data XVII kal aprilis indictione VIII anno XXXV regnante Karolo gloriosissimo rege et in successione Lotharii regis anno V Actum in monasterio S Dyonisii feliciter in Dei nomine Amen