Charter Document - 02340049

Anno ab incarnatione Domini nostri Jesu Christi DCCCLXIX gloriosi regis Caroli XXIX indictione secunda positis nobis diversorum urbium episcopis cum eodem rege in Pistis quoad componendum regni sui statum accesserat reverentissimus nobisque dilectissimus Egil gratia Dei archiepiscopus Senonice civitatis propter insidias et cupiditatem successorum impetrato regali precepto de quadam villa sui episcopatus nomine Sevriaci in comitatu Senonico sita cum mansis omnibus in Villamari et Septempiri et Longumpiri et cunctis ad eamdem villam pertinentibus plena integritate cuidam ejusdem episcopatus monasterio ad orientalem plagam prefate urbis in honorem sancti Petri dicato ubi turma monachorum jugiter Deo famulatur ob Dei ejusdemque sancti Petri amorem et honorem per sue authoritatis preceptum restitueret vel donaret et restituens vel dans perpetim habendam confirmaret Postulavit insuper ut quamdam ecclesiam ejusdem episcopatus in honore sancti Petri constructam cum omnibus ad eam pertinentibus in eodem pago Alsonis sitam eidem monasterio Sancti Petri eternaliter concederet atque concedens delegaret Cujus petitionem libenter suscipiens libentissimeque perficiens restituit que juris illarum esse dicebantur Et dedit vel largitus est authoritate et potestate regis quod pie a memorato antistite postulatum est ut quia locum sue sepulture in eodem monasterio preparare decreverat ex eadem ecclesia luminare ibi continuatim ministraretur et prefata villa cum suis appenditiis usibus monachorum ibi degentium deserviat Hoc igitur preceptum flagitavit carissimus et dulcissimus Egil coepiscopus ut nostre fraternitatis conventus privilegio nostre authoritatis roboraret atque confirmaret neque abnuimus Igitur statuimus ut hec restitutio vel largitio nostri senioris atque prefati antistitis perpetualiter observetur neque a successoribus suis ullo modo violetur sed semper ad usus fratrum et ad lumen sufficiendum pro sua sepultura teneatur non modo hec verum etiam omnia que in tempore videntur habere vel quidquid deinceps acquirere potuerint seu a fidelibus eis collatum fuerit causa eleemosyne insolubiliter ab illis possideatur Quod si quis nostram exiguitatem contemnendo per aliquam cupiditatem vel subreptionem hoc nostrum decretum infregerit secundum authoritatem quam in beato Petro accepimus dicente Domino Quodcunque ligaveris super terram erit ligatum et in celis et quodcunque solveris super terram erit solutum et in celis eum juste ac rationabiliter anathematis vinculo obligamus qui ceca cupiditate hec Dei servorum stipendia etiam post nostram prohibitionem auferre presumpserit Atque ut hec constitutio vera credatur et profutura Dei famulis omni tempore inviolabiliter conservetur manus nostre subscriptionibus eam universi firmavimus et insuper tam absentes quam futuros nostri ordinis cooperatores seu quoslibet vere religionis sectatores poscimus ut hanc tanti pontificis largitionem cum legeriut vel audierint voto et subscriptione eam nobiscum roborent Ego Egil indignus archiepiscopus Senonensis ecclesie hanc donationem et constitutionem a me factam subscripsi Fulcarius Tricassensis episcopus Ego Christianus Autissiodorensis ecclesie episcopus Eneas Parisiensis episcopus Hildegarius Meldensis episcopus Abbo Nevernensis Gualterius Aurelianensis Guenilo Rothomagensis Isaac Lingonice civitatis episcopus Hincmarus metropolitanus Remensis Wlphardus Bituricensis Ayrardus Turonensis metropolitanus episcopus