Charter Document - 02340030
| Charter Number: | 02340030 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 0847 |
| Date type: | Internal, Calendar, Regnal |
| Resource Link(s): |
TELMA - Traitement électronique des manuscrits et des archives |
Charter:
In nomine sancte et individue trinitatis Karolus gratia Dei rex Si pro locis Deo dicatis et justis servorum Dei petitionibus inibi Domino famulantium implendis aurem clementie nostre benigno favore accommodamus hoc ad anime nostre remedium stabilitatemque regni nostri procul dubio pertinere confidimus Quapropter noverit omnium fidelium sancte Dei ecclesie nostrorumque presentium necnon et futurorum experientia qualiter monachi de cenobio sancte Columbe virginis martirisque Christi adientes serenitatem celsitudinis nostre obtulerunt nobis preceptionem domni pie recordationis genitoris nostri Hludowici gloriosissimi augusti continentem quasdam villas de memorato cenobio ad usus fratrum delegatas Sed quorundam rectorum cupiditate unam ex illis villam nuncupatam Cuciacum in prospectu ipsius monasterii sitam nuperrime subtractam et in beneficio datam significaverunt Nos denique ita verum esse cognoscentes placuit largitati nostre eandem villam una cum consensu Lantberti jam dicti loci rectoris ad supplendam eorum necessitatem reddere atque per hoc precellentie nostre preceptum plenius confirmare Precipientes ergo jubemus ut memorata villa cum omnibus appenditiis suis utilitatibus fratrum omni tempore solummodo deserviat Rectoresque ejusdem loci qui futuris temporibus per curricula temporum ibi successerint nullam de jam dicta villa habeant potestatem subtrendi aut in suos usus convertendi seu in beneficium cuipiam dandi Sed liceat eis pretaxatam villam ut dictum est omni cum integritate sibi ordinare et secundum communem eorum necessitatem disponere quatinus pro nobis conjuge proleque nostra melius eos delectet Dei misericordiam perhenniter exorare Ut autem hec preceptionis nostre redditio pleniorem et inconvulsam semper in Dei nomine obtineat firmitatem manu nostra subter eam firmavimus et anuli nostri impressione insigniri jussimus Signum Karoli gloriosissimi regis Gislebertus notarius ad vicem Hludowici recognovit et subscripsit Data non decembr anno VIII regnante Karolo gloriosissimo rege indictione X Actum in Compendio regio palatio in Dei nomine feliciter Amen