Charter Document - 02340022

In nomine domini Dei et salvatoris nostri Jesu Christi Hludowicus divina ordinante providentia imperator augustus Si petitionibus servorum Dei justis et rationabilibus divini cultus amore favemus digne retributionis premio nos a Domino remunerari fideliter credimus Idcirco noverit omnium fidelium nostrorum tam presentium quam et futurorum sollertia quia vir venerabilis Sulpicius abba monasterii S Columbe martyris Christi in quo ipsius et S Lupi confessoris Christi corpora humata venerantur detulit obtutibus nostris quandam auctoritatem inmunitatis domni et genitori nostri Karoli bone memorie piissimi augusti in qua erat insertum qualiter idem ipse et antecessores ejus reges videlicet Francorum predictum monasterium ob amorem Dei tranquillitatemque fratrum ibidem consistentium sub plenissima tuitione et immunitatis defensione habuissent Continebatur etiam in eadem auctoritate quod Lotharius et Dagobertus quondam reges eidem monasterio quasdam villas concessissent quarum vocabula sunt Cersiacus et Grandis Campus easdemque villas vel quicquid eo tempore juste et rationabiliter predictum possidebat monasterium idem domnus imperator per eandem confirmavit auctoritatem ut suo et successorum temporibus jure perpetuo a prelatis et agentibus ipsius monasterii possiderentur Ob firmitatem tamen rei postulavit nos predictus Sulpicius abba ut paternam auctoritatem propter reverentiam memoratorum sanctorum et eterne retributionis fructum nostra confirmaremus auctoritate Cujus petitioni libenter annuentes postulata concessimus et ea per hanc nostram auctoritatem confirmamus Quapropter precipientes jubemus ut nullus judex publicus vel alia quelibet judiciarie potestatis predita persona in ecclesias aut loca vel agros seu reliquas possessiones memorati monasterii quas moderno tempore in quibuslibet pagis et territoriis infra ditionem imperii nostri juste et legaliter possidet vel que deinceps in jure ipsius sancti loci voluerit divina pietas augeri ad causas judiciario more audiendas vel freda exigenda aut mansiones vel paratas faciendas aut fide jussores tollendos aut homines ipsius monasterii tam ingenuos quam et servos super terram ipsius commanentes injuste distringendos aut sicut in predicta auctoritate domni imperatoris continetur consuetudinarios distringendos aut theloneum tollendum aut ullas redhibitiones aut inlicitas occasiones requirendas ullo unquam tempore ingredi audeat vel ea que supra memorata sunt penitus exigere presumat Sed liceat memorato abbati suisque successoribus res predicti monasterii sub immunitatis nostre defensione quieto ordine possidere Et quicquid exinde fiscus sperare poterit totum nos pro eterna remuneratione prefato monasterio concedimus ut in alimonia pauperum et stipendia monachorum ibidem Deo famulantium perenniter proficiat in augmentis De villis vero superius nominatis vel de omnibus rebus presenti tempore juste possessis sic in ditione ipsius monasterii perpetuo permaneant sicut in auctoritate domni et genitoris nostri vel predecessorum regum continetur quatenus ipsos monachos qui ibidem Deo famulantur pro nobis et conjuge proleque nostra atque stabilitate totius imperii nostri a Deo nobis concessi ejusque clementissima miseratione per immensum conservandi jugiter Domini misericordiam exorare delectet Hanc itaque auctoritatem ut pleniorem in Dei nomine obtineat vigorem et a fidelibus sancte Dei ecclesie et nostris verius credatur et diligentius conservetur manu propria subter firmavimus et anuli nostri impressione signari jussimus Signum Hludowici serenissimi imperatoris Maginarius notarius ad vicem Theotonis recognovit Data IV idus junii anno Christo propitio XX imperii domni Hludowici serenissimi imper indictione XI Actum Wormatia civitate in Dei nomine feliciter Amen