Charter Document - 02340004

Anno octavo regni domni Dagoberti regis indictione septima in nomine Dei omnipotentis Patris et Filii et Spiritus Sancti Palladius quamvis peccator et fragilis sancte Autissiodorensis ecclesie episcopus omnibus Dei fidelibus et in christiana veritate perseverantibus pax perpetua et salus eterna in Domino Jesu Christo redemptore nostro Magnum et mirabile donum Dei est quum de temporalibus et transitoriis atque caducis rebus premia acquiruntur in celis sine fine mansura Unde ego spem magnam et fiduciam habens in Domino cogitavi ut aliquod memoriale Deo devovere et ad perfectum deducere non tardarem Propterea cognoscat omnis sancta Dei ecclesia et omnes ejus ministri tam sacerdotes et confessores quam et laici ordinis utriusque sexus meis laboribus propriis et impensionibus pro vita eterna promerenda et christiana religione amplificanda me cellam sive cenobium in suburbano Autissiodorensi construxisse in basilicis tribus id est domne Marie perpetue virginis et domni Andree apostoli et sancti Juliani martyris cum oratorio sancti Ferreoli et sancti Martini annuente et consolante domno nostro Dagoberto piissimo rege ordinavi et statui qualiter ibi sanctimoniales puelle et vidue Domino deservire sinceriter debeant deputans quasdam res ex ipsa ecclesia episcopatus Sancti Stephani que mihi indigno commissus est eidem addens insuper tres agros nobilissimos quos mihi prefatus domnus Dagobertus sua largitione concessit id est Mitiganna in territorio Senonico cum omnibus appendiciis suis et in territorio Autissiodorensi Vincella super Icaunam fluvium similiter in eodem pago Truciacum cum omnibus jure ad se pertinentibus De rebus autem ecclesie mee ordinavi ut ibi deservire debeant in pago Autissiodorensi villam que dicitur Vallis et Clamiciacum quam dominus Desiderius papa ex Godino et ejus heredibus per pecuniam visus est recepisse et in pago Avalense coloniam Auduniacam et in territorio Senonico Campobassum in pago quoque Trecassino agellum nuncupatum Rulliacum et in territorio Tornodorensi Criacus In pago Betorico tertiam partem agri quod vocatur Sissima ad luminaria concinnanda reliquas duas partes ad lumen ecclesie senioris Sancti Stephani reservatas Ad hoc autem procurandum et intersecus divina religione stabiliendum res quasdam militares et servitutes ecclesie mee exercendo Andegisum venerabilem diaconum constituimus Deinde hoc addentes ut singulis diebus in basilicis tribus singulas missas absque reliquo officio sanctarum horarum et diurnali missa cum oblationibus et orationibus celebrare non desinant Quinta vero feria omnibus hebdomadibus cum litaniis et crucibus omnis illa congregatio ad basilicam seniorem Sancti Stephani infra muros venire non desinat et ibi missas celebrent In primis pro domino nostro piissimo rege Dagoberto et ejus nobilissima stirpe tam preterita quam futura et omnibus christianis regibus et pro me peccatore et omnibus antecessoribus et successoribus meis qui in hac sancta sede sederunt vel sedere habebunt et pro omni populo sancto Dei Si quis vero [quod futurum esse non credo nisi Deus fieri permittat] qui hanc religionem et eleemosynam de mea parvitate institutam destruere presumserit aut de potestate hujus ecclesie pontificis abstrahere vel minuere de his que supra diximus vel que Deus ibi augere voluerit diabolica plenus nequitia auferre tentaverit queque ille sublimis vel mediocris persona exstiterit convocamus contra eum celum et terram omnes angelos et archangelos prophetas et patriarchas apostolos et martyrium sancti Stephani et sancti Juliani et cum omnibus martyribus confessoribus et virginibus et omnibus sanctis Dei quatenus in primis iram Dei incurrat et ab omnibus sanctis alienus exsistat et inferni eum vorago excruciet et cum Dathan et Abiron et cum Anania et Saphira et Simone mago sententiam judicii eterni incurrat nisi condignam emendationem fecerit tollatur ne videat gloriam Dei neque remittatur illi in presenti seculo neque in futuro Palladius quamvis peccator et fragilis episcopus subscripsi