Charter Document - 02330173

Nos Johannes Comes Burgundie Dominusque Salinensis universis et singulis presentibus preteritis et futuris salutem et notitiam rei geste Justum est et rationi atque misericordie operibus consonum ibi manum adjutricem porrigere largiorem ubi cultus divinus augmentatur et Religionis favor atque personarum Deo servientium numerus ampliatur Inde est quod cum in puram et perpetuam elemosinam dederimus et concesserimus Deo et prioratui sancti Cornelii castri nostri de Stella monasterio Trenorchiensi subjecto vigenti libras stephanenses annuas in baderna nostra Ledonensi que dicitur baderna Elemosinarum singulis annis percipiendas dederimus etiam in divine laudis augmentum et fervorem religionis ampliandum necnon pro remedio anime nostre et Lorete uxoris nostre et antecessorum nostrorum prefato prioratui S Cornelii Priori et Fratribus ibidem Deo servientibus constitutis et constituendis quatuor sarcinas salis in predicto baderna a Priore et Fratribus predicti prioratus cum predictis vigenti libris a nobis eisdem concessis annis singulis ante omnes alias elemosinas nostras quibusque personis vel locis in dicta baderna concessa vel concedendas in perpetuum percipiendas Item cum dederimus et concesserimus in perpetuum Priori et Fratribus predicti prioratus decem modios vini ad mensuram Castri Karoli in vineis nostris de Stella singulis annis in posterum capiendos et levari habendos salvis decimis vinearum nostrarum sitarum juxta et prope Stellam in Parochia S Cornelli quas decimas volumus et concedimus a Priore de S Cornelio et a monachis ibidem Deo servientibus de cetero in perpetuum levari percipi et haberi prout dictus Prior ante prefatas donationes decimas in aliis locis dicte Parochie percipere consueverat et debebat Nos inspecta utilitate dicti prioratus et cupientes conditionem ipsius facere meliorem necnon statum ipsius in melius reformare de voluntate et requisitione Prioris S Cornelii et monachorum ibidem constitutorum necnon laude et assensu religiosorum virorum Hugonis Abbatis Trenorchiensis et totius ejusdem loci Conventus quibus dictus prioratus dignoscitur esse subjectus in recompensationem et permutationem supradictorum decem modiorum vini et septem librarum stephanensium tollendarum vel deducendarum de supradictis vigenti libris dedimus donatione irrevocabili inter vivos concessimus assignavimus tradidimus remisimus et quittavimus in puram et perpetuam elemosinam Deo et prioratui S Cornelii Priori et Fratribus ibidem Deo servientibus constitutis et constituendis vineam nostram dictam de Froitcul sitam juxta montem que dicitur Monsmoreins cum terra contigua desuper dicte vinee que se extendit usque ad metas positas de mandato nostro ad modum longitudinis vinee supradicte Assedimus etiam assignavimus et tradidimus predicti Priori et Fratribus alias tresdecim libras residuas de supradictis vigenti libris super pedagio nostro d'Arlay ab ipsis in perpetuum percipiendis annis singulis levandas et habendas Que vero si forsitan ob aliquod infortunium super dicto pedagio non possent levari vel haberi volumus et precipimus quod in taillia quam habemus super homines in dicta villa d'Arlay leventur percipiantur et habeantur ab ipsis Priore et Fratribus S Cornelii ut supradictum est habende et possidende Quam quidem vineam terram et supradictas tresdecim libras predictis Priori et Fratribus ibidem constitutis et constituendis pro nobis et heredibus nostris bona fide contra omnes promisimus defendere et garantire Pro quibus scilicet vinea terra et dictis tresdecim libris nos et heredes nostros in perpetuum prenominati Prior et Monachi de laude et assensu dicti Hugonis Abbatis Trenorchiensis et totius ejusdem loci Conventus de supradictis decem modiis vini et de dictis viginti libris contractum permutationis ex certa scientia celebrantes penitus quittaverunt supradictis quatuor sarcinis salis habendis et percipiendis quolibet anno a dictis Priore et Fratribus in baderna nostra Ledonensi sicut superius est expressum In recompensationem autem omnium supradictorum voluerunt et promiserunt nobis bona fide viri religiosi Hugo Abbas Trenorchiensis totusque Conventus ejusdem loci quibus dictus Prioratus dignoscitur subesse in dicto prioratu quatuor Monachos ibidem Deo servientes et residentes constituere pro laude Dei exaltanda et divino officio ampliando Item dederunt et concesserunt nobis in perpetuum et heredibus nostris predicti Abbas et Conventus quamdam vineam sitam juxta clausum nostrum de S Cornelio a nobis et heredibus nostris in perpetuum possidendam salva decima dictorum Monachorum quam in ea volumus eos percipere et habere prout superius est expressum Tenentur autem predicti Abbas et Conventus in die obitus nostri celebrare solemniter annis singulis anniversarium nostrum in Monasterio Trenorchiensi et in dicto Prioratu pro remedio anime nostre et Lorete Comitisse uxoris nostre et omnium aliorum antecessorum nostrorum et facere pro nobis quanto pro monacho defuncto in Monasterio Trenorchiensi fieri consuevit Nos autem quando predicta omnia prefato prioratui contulimus talem conditionem apposuimus quod dicti Abbas et Conventus vel Prior ibidem pro tempore constituendus predictas res eisdem a nobis concessas vel in futurum a nobis concedendas non vendent non donabunt non obligabunt nec alio quocumque modo a predicto prioratu alienabunt vel etiam aliis usibus applicabunt In cujus rei robur et memoriam ad confirmationem rerum predictarum in perpetuum faciendam dictis Abbati et Conventui presentes Litteras tradidimus sigilli nostri munimine roboratas Actum anno Domini MCC sexagesimo quarto mense Martii