Charter Document - 02330164
Charter Number: | 02330164 |
---|---|
Cartulary Title: | Nouvelle Histoire de l'Abbaye Royale et Collégiale de Saint-Filibert et de la Ville de Tournus |
Charter Language: | Latin |
Charter Origin: | Papal |
Charter Type(s): | Mandate |
Date: | 1257 |
Date type: | Internal, Calendar, Papal |
Resource Link(s): |
|
Charter:
Alexander Episcopus servus servorum Dei dilecto filio [] Abbati Insule Barbare Lugduni dioecesis salutem et apostolicam benedictionem Gravem nobis dilecti filii Abbas et Conventus monasterii Trenorchiensis Ordinis S Benedicti ad Romanam Ecclesiam nullo medio pertinentis Cabilonensis dioecesis querimoniam destinarunt quod cum temporalis jurisdictio et dominium ville loci ejusdem ad ipsos et idem monasterium solum pertineat et habitatores ville ipsius sint homines eorumdem nonnulli hominum ipsorum interdum alicui Baroni vel alii nobili homagium seu fidelitatem faciunt ab eorum jurisdictione se per hoc subducere intendentes et cum super consuetis et debitis servitiis requiruntur ab ipsis iidem se esse de predictorum Baronis vel nobilis juridictione per excogitatam malitiam asserentes eis hujusmodi servitia exhibere ac eorum parere judiciis contradicunt quamquam in eadem villa moram trahentes bona teneant et possideant supradicta in eorumdem Abbatis et conventus et monasterii prejudicium et gravamen propter quod de ipsius juridictionis et dominii amissione non modicum periculum monasterio imminet supradicto Cum igitur nos quibus Ecclesiarum cura et sollicitudo incumbit in perversos ibi fortius debeamus insurgere ubi contra eos illorum perversitas periculosius exardescit discretioni tue per apostolica scripta mandamus quatenus si est ita dictos homines qui talia facere presumpserunt ut a villa ipsa recedant in ea de cetero minime moraturi dimissis illis que a monasterio ipso tenent monitione premissa per te vel per alium sicut justum fuerit appellatione remota compellas In illos autem homines ville predicte qui talia deinceps facere presumpserint et in illum vel illos Barones aut alios nobiles qui homines ipsos ad homagium taliter receperint in monasterii prejudicium memorati si a te super hoc diligenter admoniti non destiterint sententiam excommunicationis promulges quam in locis quibus expedire videris publices vel facias publicari Datum Laterani X Kalendas Februarii pontificatus nostri anno tertio