Charter Document - 02330159
| Charter Number: | 02330159 |
|---|---|
| Cartulary Title: | Nouvelle Histoire de l'Abbaye Royale et Collégiale de Saint-Filibert et de la Ville de Tournus |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1251 |
| Date type: | Internal, A.D., Feast |
| Resource Link(s): |
|
Charter:
Nos Armandus de Podempniaco Abbas Sancti Petri de Turre Aniciensis notum facimus universis presentes litteras inspecturis quod cum religiosus vir frater R Abbas Trenorchiensis domum de Vouta cum omnibus juribus et pertinentiis suis nobis dederit et concesserit quoad vixerimus possidendam Nos eidem bona fide promittimus et juramus super sancta Dei Evangelia dictam domum cum juribus et libertatibus ipsius pro posse nostro illibatam conservare et tenemur dictam domum absolvi facere a debitis suis intra instantem quindenam Pasche et ex tunc ipsam nulli debitorum homini obligare Ecclesiam dicti loci et domos intra decennium reficere et etiam consummare tribus monachis ibidem Deo famulantibus in necessariis providere Abbatem Trenorchiensem quotiescumque ad locum venerit honorabiliter procurare nuncios Abbatie Trenorchiensis benigne recipere censum conventui Trenorchiensi debitum et taxatum reddere et facere quecumque Priores qui in dicta domo pro tempore fuerunt facere consueverunt Sciendum tamen est quod quidquid humanitus de persona nostra contingat dicta domus ad dictum Abbatem debet reverti cum omnibus mobilibus et immobilibus et meliorationibus ibi factis et remanere ab omni debito et obligatione libera et immunis Et super hiis omnibus et singulis attendendis et firmiter observandis debemus firmos et certos reddere infra instantem quindenam Pasche Priorem de Godeto nomine dicti Abbatis per litteras B Dei gratia Aniciensis Episcopi Nos itaque supradictus Abbas S Petri pro omnibus supradictis attendendis et observandis subponimus nos et successores nostros et bona nostra presentia et futura et homines nostros jurisdictioni ac potestati supradicti Domini Episcopi ut ad requisitionem dicti Abbatis vel mandati ipsius nos possit compellere admonitos vel non admonitos tam brachio seculari quam per censuram ecclesiasticam et personam nostram terram et homines sententie interdicti seu excommunicationis subponendo ad omnia supradicta et singula attendenda Nos igitur B divina miseratione Aniciensis Episcopus de consensu et voluntate dicti Abbatis S Petri et ad ejus requisitionem in testimonium et firmitatem omnium predictorum fecimus presentem cartulam sigillo nostro et nos dictus Abbas S Petri de Turre Aniciensis sigillo proprio roborari Datum apud castrum de Labte die Veneris post octabas Pasche anno Domini MCCLI