Charter Document - 02330134
| Charter Number: | 02330134 |
|---|---|
| Cartulary Title: | Nouvelle Histoire de l'Abbaye Royale et Collégiale de Saint-Filibert et de la Ville de Tournus |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1233 |
| Date type: | Internal, A.D., Feast |
| Resource Link(s): |
|
Charter:
Quoniam labilis est hominum memoria et labuntur cum tempore ea que fiunt in tempore nisi scripturarum apicibus commendentur idcirco ego Johannes Comes Matisconensis et nobilis Domina A uxor mea filia bone memorie Domini Girardi de Vienna universis ad quos presentes littere devenerint memoriam rei geste Noverit universitas vestra quod nos uno consensu una voluntate pariter et consilio divinitus inspirati ob eternam remunerationem de rebus nostris placuit beate Dei Genitrici et perpetue Virgini Marie ad honorem Domini Jesu Christi ejusdem dilecti filii aliqua in heleemosinam erogare sperantes propter hoc juxta Salvatoris promissionem veridicam peccata nostra extingui penitus sicut ignis aqua extinguitur et cum mercede centuplici vitam nos adepturos eternam Inde est quod notum fieri volumus tam futuris quam presentibus quod nos dedimus Deo et beate Dei Genitrici Marie beato Valeriano martyri beato Philiberto Confessori et omnibus Sanctis Dei quorum reliquie in Trenorchiensi requiescunt Ecclesia necnon dilecto nostro Domino Berardo Abbati ejusdem Ecclesie et per ipsum futuris in eadem Ecclesia post ipsum Abbatibus Insulam nostram magnam sitam in medio Sagone supra Matisconem prope Parcum quam idem Abbas emit a Martino Charboneo qui ipsam tunc temporis tenebat a nobis ita ut in libera eleemosina ipsam Insulam et omnes res eidem adjacentes et ad ipsam pertinentes sicuti in donatione nostra plenius continetur et quidquid in eisdem habere poteramus dictus Abbas et sui successores libere quiete et pacifice in perpetuum teneant et possideant sine aliqua exactione et consuetudine pleno jure concedimus siquidem et donamus et volumus ut ibidem edificent sive in terra sive in aqua bastimenta omnimoda et quidquid illis visum fuerit necessarium ad utilitatem ejusdem domus et necessitatem necnon ut ipsi habeant introitum et exitum navem et portum et vias publicas ultra Sagonam et citra per loca magis congrua et idonea loco illi Concessimus et donavimus preterea eisdem usagium in nemoribus nostris ad bastiendum de omnibus lignis ad calefaciendum et ad omnia necessaria ejusdem domus de nemore quod vulgo Mortuum vocatur Item eisdem concessimus et donavimus terras ad colendum continue de quatuor bobus annuatim vel ad faciendum inde suam voluntatem de terris scilicet de Chastenay in loco magis vicino et congruo loco illi et prata sita inter Anes et Asneres in quibus quatuor charratas feni colligant annuatim Item concedimus illis et donamus omnimodam piscationem Sagone circa eandem Insulam et quantum eadem Insula protenditur hinc et inde Salva tamen custodia nostra quam nobis in eodem loco ad bonos usus Burgundie retinemus In cujus quidem rei confirmationem et testimonium presenti carte sigilla nostra duximus apponenda Actum anno Domini millesimo ducentesimo tricesimo tertio in festo beati Martini Hyemalis