Charter Document - 02330131

Ego Renaudus Dominus Baugiaci universis ad quos presens scriptum devenerit memoriam rei geste universitati vestre tenore presentium volumus innotescere quod cum controversia esset inter me Karissimam matrem meam et venerabilem Dominum meum Ecclesie Trenorchiensis Abbatem et ejusdem loci conventum super querelis omnibus motis ab Abbate et Ecclesia Trenorchiensi contra me et matrem meam pro prioratu Bisyaci de consensu et voluntate mea et matris mee in arbitros a partibus electos communiter in H Camerarium et P de Nanton Hostalarium monachos Trenorchienses pro Domino Abbate et Ecclesia Trenorchiensi in Dominum Henricum de Aula et H de Broces Milites pro me et matre mea compromisimus in hunc modum Videlicet quod arbitratores predicti juraverunt tactis sacrosanctis Evangeliis inquirere ab hominibus Bisyaci et ab aliis per quos posset melius de veritate liquere jura et consuetudines utriusque partis et inquisitione facta querelas motas pace vel judicio terminare Prenominati vero arbitratores tam ab hominibus meis quam ab hominibus Abbatis et Ecclesie Trenorchiensis inquisierunt per sacramentum veritatem super singulis articulis qui in subsequentibus declarabuntur Invenerunt siquidem prefati arbitratores ab hominibus pro utraque parte juratis quod in villa Bisyaci nullum debemus habere Chacepol nisi tantum Prepositum qui debet habere in qualibet colungia sive manso in quibus accipimus talliam viginti sex librarum Matisconensium pro garda unum meterium bladi tempore messium et nihil amplius a predictis hominibus qui sunt de garda exigere potest ab aliis vero hominibus qui mere ad dominium Ecclesie Trenorchiensis pertinere noscuntur nihil exigere potest dictus Prepositus Omne siquidem dominium et omnes clamores ad Priorem Bisyaci debent devenire et cum justitia et districtu dicti Prioris terminari exceptis criminibus adulterii furti et homicidii que debent pugniri per Prepositum nostrum si in facto fuerint deprehensi publice Si autem suspecti fuerint de criminibus superius expressis Prepositus noster debet ipsum convenire ut satisdet Quod si satisdare recusaverit debet ipsum retinere donec Priori significet et tunc Prior et Prepositus debent audire probationes contra illum qui accusatus fuerit et auditis probationibus si convictus fuerit Prepositus noster ipsum pugniet secundum terre consuetudinem et criminis quantitatem excepto adulterio pro quo debentur sexaginta solidi monete terre tantum Si autem Prior non conveniret cum Preposito nostro super probationibus factis vel faciendis aut super aliis articulis emergentibus illa discordia debet per venerabilem Dominum Abbatem Trenorchiensem et per nos vel per certos nuntios suos et nostros terminari secundum consuetudines terre Baugiaci in hujusmodi criminibus approbatas In colongiis vero et mansis in quibus habemus talliam superius nominatam pro garda habemus bannum sanguinis si probatus fuerit sanguis contra illum qui fecerit sanguinem in aliis non habemus Illi vero de colongiis et mansis in quibus habemus talliam prenominatam pro garda debent nobis corvetas et cavalcatas nostras quando per nos vel Prepositum nostrum fuerint requisiti Alii vero ad hoc non tenentur nisi de consensu et voluntate Prioris Duas siquidem gallinas habemus in mansis et colongiis que ad gardam supradictam spectant in aliis nullas habemus In canabo et lino nullum jus vindicare possumus nisi gratis nobis ab hominibus conferatur Omne vero jus et justitiam et consuetudines si quas habuerimus vel habere intendebamus aut predecessores nostri pro remedio anime ac parentum nostrorum quittamus Ecclesie memorate exceptis juribus et consuetudinibus superius nominatis Amovemus siquidem in perpetuum le Chacepol firmiter promittentes quod per nos nec per alios loco nostri ibidem Chacepols de cetero instituetur inhibentes heredibus nostris ne istud attemptare presumant Prenominati vero Abbas et Conventus dederunt et concesserunt nobis et heredibus nostris in recompensationem remotionis de Chacepol et in augmentationem feodi nostri et pro pace firmiter observanda sicut superius est expressa viginti quinque meteria avene ad mensuram Baugiaci que debent levari a Priore Bisyaci super universos homines qui ad dictum prioratum Bisyaci pertinent tam ab hominibus garde quam ab aliis et in festo beati Martini nobis vel certo nuntio nostro a Priore Bisyaci reddi In cujus rei testimonium presentes litteras memoratis Abbati et Conventui Trenorchiensi tradidi sigilli mei munimine roboratas Actum anno Domini MCC tricesimosecundo mense Aprilis