Charter Document - 02330115

In nomine sancte et individue Trinitatis in perpetuum Amen Ego Stephanus humilis Trenorchiensis Minister et totus ejusdem loci Conventus notum fieri volumus tam presentibus quam futuris nos et burgenses ville Trenorchiensis in certam formam compositionis devenisse de consuetudine ville Trenorchiensis que mortua manus dicebatur tollenda et aliis in justam recompensationem loco ipsius in eadem villa ponendis In primis enim nobis acquisierunt omnes usagios ville Trenorchiensis videlicet saunariam furnos bichonagium ventariam molendina et nobis ea quitari fecerunt ab eis qui vel ad censum vel in feodum a nobis ea tenebant Tandem mensurari fecimus ad tesam rapinalem totam villam infra ambitum murorum tam domos quam plastros et hortos et in singulis tesis per carrerias et vias diversum censum pro diversitate commoditatum de communi omnium burgensium assensu et voluntate posuimus censum duplicantes in stallis rerum venalium et banchis ad carnes vendendas In quibusdam vero tesis XVIII denarios in aliis XXI in aliis XII in aliis VIII in aliis VI in paucis duos solidos singulis annis in festo Sancti Martini sine dilatione et difficultate nobis solvendos juste considerationis moderamine omnes burgenses poni voluerunt Ita tamen quod si census in predicta festivitate vel in ejus crastinum requisitus ab officialibus Ecclesie sponte redditus cum integritate non fuerit contemptores deinceps in duplum teneantur et duplicatum pro pena velint nolint reddere compellantur Nos vero pro his omnibus consuetudinem illam que mortua manus dicebatur et odiosa dura nimis et importabilis burgensibus ville Trenorchiensis erat sed et infamis et peregrina videbatur extraneis sibi suisque successoribus cum bona voluntate et fide remisimus in perpetuum Ita etiam ut vidue cum voluerint nubant et orphani et clerici de his que jure hereditario possident liberam sicut alii facultatem habeant testandi Sane ut eorum desiderium perfecte compleremus et in nullo petitiones ipsorum apud nos repulsam paterentur pro hac concordia inter nos et illos inconvulsis manenda radicibus et a nobis inviolabiliter observanda consuetudinem de bove Decani ad macellum vendendo necnon et vinearum custodiam eis liberaliter dedimus tali conditione retenta quod burgenses custodes integre opinionis et fideles eligant electos Decano representent in cujus conspectu super sanctum Evangelium jurent se vineas fideliter tota diligentia servaturos Qui si forte aliquem vel aliquam in vineis vel extra cum damno vinearum invenerint vadiabunt eum quod si non poterunt Decano nunciabunt qui a malefactore per ipsos custodes legitime convicto damnum burgensi cui fuit injuriosus prius ad justam estimationem faciet emendari et ipse deinceps Decanus ab eo sine contradictione bannum centum solidorum accipiet Qui si forte nichil habuerit pro arbitrio Decani ut ceteri merum habeant corporale supplicium sustinebit Custodes vero si infideles et perjuri per burgenses vel familiam Ecclesie juste convicti fuerint Decanus sicut ei visum fuerit eos puniet et burgenses alios fideliores [juxta formam superius expressam] Decano presentabunt Has igitur omnes consuetudines cum mortua manu bono animo et bona voluntate gratia burgensium a villa removimus et eam a vinculo hujus improperii et tam dire conditionis [sicut burgensibus videtur] liberam et absolutam usque in sempiternum sine retractatione volumus remanere Salvis per omnia aliis omnibus ville consuetudinibus que ad dominium et dignitatem Ecclesie pertinere noscuntur Actum est hoc anno ab Incarnatione Domini MCCI in Capitulo Trenorchiensi nobis presentibus laudantibus et confirmantibus Presente etiam Domno Roberto Cabilonensi Episcopo sedente in Urbe sanctissimo Patre nostro Innocentio regnante in Francia victoriosissimo Rege Philippo qui hujus formam compositionis sua auctoritate roboravit sicut in ejus authentico continetur