Charter Document - 02330097
| Charter Number: | 02330097 |
|---|---|
| Cartulary Title: | Nouvelle Histoire de l'Abbaye Royale et Collégiale de Saint-Filibert et de la Ville de Tournus |
| Charter Language: | Latin |
| Charter Origin: | Royal |
| Charter Type(s): | Judgement |
| Date: | 1171 |
| Date type: | Internal, A.D. |
| Resource Link(s): |
|
Charter:
In nomine sancte et individue Trinitatis amen Ludovicus Dei gratia Francorum Rex Ad compescendam predonum malitiam et guerrarum assiduitatem que longo tempore jam invaluerat cum armis Burgundiam ingressi tandem venimus Trenorchium ubi inter Abbatem fidelem nostrum Letbaudum et monachorum conventum et homines suos Burgenses invenimus discordiam super consuetudinibus que mortua manus et tallia dicuntur et super aliis pluribus querelis Audita eorum controversia paci intendimus et ex utraque parte in sententiam nostram compromiserunt et in dictum nostrum ac Curie nostre se miserunt Communicato igitur consilio cum nobili et fideli nostro Umberto Bellijoci Domino et ceteris qui nobiscum aderant talem inter eos pacem proloqui uti sumus et fecimus Mortua manus Abbati et Ecclesie in pace remanebit toto quod a transactis temporibus inde debebatur burgensibus condonato Talliam quam singulis annis exigebant temperavimus hoc modo Abbas super burgenses nullam deinceps faciet talliam nisi pro auxilio aut procuratione nostra aut procuratione Domini Pape aut alicujus Cardinalium Si Abbas submonitus fuerit ad Concilium vel ad Curiam Domini Pape aut pro incremento Ecclesie sue aut diminutione defendenda Dominum Papam adierit vel ad nos venerit pro expeditione aut pro regali nostro recipiendo aut pro alio negotio nostro vel Ecclesie quod fuerit grande tunc rationabile secundum qualitatem et quantitatem negotii queret auxilium et capiet ab hominibus suis Si vero pro privato aut quolibet alio negotio suo aut pro discordia inter ipsum et monachos exorta expensam fecerit et ad nos vel ad Dominum Papam iverit nullam pro hoc faciet questam Communiam aut commune juramentum non licebit burgensibus facere sine Abbatis et totius Capituli assensu Collecta que in piscaria ad opus cellerarii coquine fieri solet et sicut fieri solet et cetere antique consuetudines Ecclesie salve erunt Cetere autem omnes querele abhinc retro inter eos habite prorsus sunt condonate et hoc modo per manum nostram inter eos est pacificatum Quod ut ratum permaneat scribi et sigillo nostro precepimus confirmari Actum Trenorchii anno Incarnati Verbi MCLXXI Adstantibus in palatio nostro quorum nomina subscripta sunt et signa Signum Comitis Theobaldi Dapiferi nostri Signum Matthei Camerarii S Guidonis Buticularii S Radulfi Constabularii Data per manum Hugonis Cancellarii et Episcopi Suessionensis Pendet de sex funiculis e serico rubro contextis Regium sigillum inscriptum Ludovicus Dei Gratia Francorum Rex Regemque sedentem exhibens pleno vultu cum sceptro liligero in manu sinistra