Charter Document - 02330096
| Charter Number: | 02330096 |
|---|---|
| Cartulary Title: | Nouvelle Histoire de l'Abbaye Royale et Collégiale de Saint-Filibert et de la Ville de Tournus |
| Charter Language: | Latin |
| Charter Origin: | Royal |
| Charter Type(s): | Judgement |
| Date: | 1166 |
| Date type: | Internal, A.D., Regnal |
| Resource Link(s): |
|
Charter:
In nomine sancte et individue Trinitatis amen Ego Ludovicus Dei gratia Francorum Rex Per longuam Regum absentiam sine disciplina et freno justi regiminis longo tempore dissoluta fuit terra Burgundie et illis qui in terra erant alicujus potentie licuit impugnare et inter se decertare et pauperes opprimere et Ecclesiarum bona vastare Nos propter tantam indignitati malitiam et zelo Dei commoti terram Burgundie cum copiis regni intravimus obtentu faciendi vindictas et reformandi pacem in patria Notum itaque facimus universis et presentibus et futuris quod cum sederemus Cabilone ad judicandum super negotiis et ad cognoscendum causas diversas inter alia audivimus querimoniam Ecclesie Matisconensis contra Comitem Gerardum Viennensem et ipse non potuit asserere se super Ecclesiam aliquid juris habere sive in Episcopi sive in Capituli terris atque in hominibus Cognovit in plena Curia jamdictus Comes Gerardus quod vacante Sede per mortem Episcopi Matisconensis nihil omnino habet in domibus Episcopalibus neque in terris ad Episcopum pertinentibus neque in rebus mobilibus Professus est terras Ecclesie prorsus esse liberas et affirmavit quod in villa Clericorum neque procurationes sive hospitationes neque alias habet consuetudines et quod exactiones in terris Ecclesie amodo non faceret fidem manualiter dedit et juramento firmavit In villa tamen Viriaco in qua afferebat ex Comitatu se nihil habere si Dominum Miribelli aliquas consuetudines in ea habuisse probare possit illas non remisit et donec cognite essent pacem promisit Et ut cognitum sit et ratum in posterum presentem paginam sigillo nostro muniri precipimus subtus inscripto Karactere nostri nominis Actum publice Cabilone anno Incarnati Verbi millesimo centesimo sexagesimo sexto regni vero vigesimo nono astantibus in palatio nostro quorum apposita sunt nomina et signa S Comitis Theobaldi Dapiferi nostri S Guidonis Buticularii S Mathei Camerarii S Radulphi Constabularii Datum per manum Hugonis Cancellarii et Episcopi Suessionensis