Charter Document - 02330093
| Charter Number: | 02330093 |
|---|---|
| Cartulary Title: | Nouvelle Histoire de l'Abbaye Royale et Collégiale de Saint-Filibert et de la Ville de Tournus |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1159 - 1180 |
| Date type: | Assigned |
| Resource Link(s): |
|
Charter:
Alexander Episcopus servus servorum Dei carissimo in Christo filio Ludovico illustri Francorum Regi salutem et a post benedictionem Cum dilectus filius noster Trenorciensis Abbas pro allevatione Ecclesie sue que multis oneribus coartatur ad regie sublimitatis clementiam postulaturus consilium accessisset inde tandem presentiam nostram adiit asserens te cum Apostolice Sedis favore super facto ipso velle procedere et nostri beneplaciti consilio acquiescere In quo siquidem et in omnibus aliis inclytam regie devotionis virtutem diligentius attendentes et eam devotissimis in Domino laudibus commendantes sicut sepe jam fecimus super augmento et conservatione prescripte Ecclesie cum Fratribus nostris studiose ac sollicite deliberare curavimus et ad ejus onera et debita relevanda nulla via certior nobis apparuit quam ut fratres per diversa monasteria dividantur et quinque vel quatuor ibidem relictis in debitorum solutionem redditus cedant Unde regiam pietatem rogamus monemus et exhortamur in Domino atque in peccatorum veniam tibi injungimus quatinus superni Conditoris intuitu et pro remedio anime tue fratres prenominate Ecclesie per regni tui monasteria facias recipi et ad tempus eis necessaria provideri Et quoniam ita nobis visum est et Abbas consensit ut duo de fratribus et duo burgenses discreti et fideles viri ad hoc assumantur juramento astricti quod fideliter et sine fraude debeant redditus ipsos colligere et in debitorum solutionem expendere nihilominus sollicitamus celsitudinem tuam ut Ecclesiam ipsam et burgum et omnia bona sua sub regia custodia et protectione suscipias et nuncios tuos propter hoc specialiter ad locum ipsum transmittas Nos enim quantum ad officium nostrum spectat et prefatam Ecclesiam et res ad eam pertinentes simul cum burgo ejus sub nostra tuitione suscipiens et nostrum cum tuis nunciis si opus fuerit illuc destinare studebimus coram quibus hec que supra dicta sunt debeant commodius ordinari Ne autem presentes redditus possint ad manus plurium devenire suggerimus magnificentie tue ut hec sub maturitate executioni mandare intendas ita quod a Deo exinde premium possis in eterna retributione justorum recipere et gloriam sempiternam feliciter adipisci et monasterium a debitoribus onere sic valeat juvante Domino liberari Datum Senonis VIII Idus Augusti