Charter Document - 02330075

Innocentius Episcopus servus servorum Dei dilecto in Christo filio Petro Trenorciensi ejusque successoribus regulariter substituendis in perpetuum Quotiescumque illud a nobis petitur quod rationi cognoscitur convenire animo nos decet libenti concedere et petentium desideriis congruum impertiri suffragium Proinde dilecte in domino fili Petre Abbas tuis rationabilibus postulationibus assensum prebentes Trenortiense monasterium cui Deo auctore preesse dignosceris ad exemplar predecessorum nostrorum Romanorum Pontificum Apostolice Sedis patrocinio communimus Per presentis igitur privilegii paginam Apostolica auctoritate statuimus ut quecumque possessiones Catholicorum Imperatorum seu ceterorum Principum largitione Episcoporum concessione seu ceterorum fidelium oblatione ad idem cenobium legitime impresentiarum pertinent sive in futurum juste poterint adipisci firma tibi tuisque successoribus et illibata permaneant Sane diffinitionem quam inter vestrum et beati Florentii monasterium de Ecclesiis sancte Crucis et S Nicolai a Dominis predecessoribus nostris sancte memorie Urbano atque Calixto ex eorum scriptis factam cognovimus auctoritate Sedis Apostolice confirmamus Ad hec adicimus ut idem locus in quo beati Valeriani Martyris et S Philiberti Confessoris corpora requiescunt ab omni jugo secularis potestatis liber in perpetuum conservetur Nec Episcopo liceat cujuscumque diocesis eumdem excommunicationis absolutionis vel cujuslibet dispositionis occasionibus perturbare aut cruces seu quaslibet exactiones novas burgo et ceteris monasterii possessionibus irrogare Missas quoque in eodem monasterio publicas celebrari vel stationes ab Episcopo preter Abbatis vel fratrum voluntatem fieri prohibemus Preterea pro reverentia beate Marie Matris Domini cujus nomine locus vester insignitus est in Annunciatione dominica hymnum angelicum inter Missarum sollemnia Abbati vel fratribus pronunciare concedimus Obeunte autem ejusdem loci Abbate nullus ibi qualibet subreptionis astutia seu violentia preponatur nisi quem fratres communi consensu vel pars consilii sanioris secundum Deum et beati Benedicti regulam providerint eligendum ab Apostolice Sedis Episcopo vel ejus Legato consecrandum Nulli ergo hominum omnino fas sit prenominatum cenobium perturbare aut ejus possessiones auferre vel ablatas retinere minuere aut aliquibus vexationibus fatigare sed omnia integra conserventur eorum pro quorum gubernatione et sustentatione concesia sunt usibus omnimodis profutura Si qua igitur in futurum ecclesiastica secularisve persona hanc nostre constitutionis paginam sciens contra eam venire tentaverit secundo tertiove commonita si non satisfactione congrua emendaverit potestatis honorisque sui dignitate careat reamque se existere divino judicio de perpetrata iniquitate cognoscat et a sacratissimo Corpore ac Sanguine Dei et Domini Redemptoris nostri Jesu Christi aliena fiat atque in extremo examine districte ultioni subjaceat Cunctis autem eidem loco justa servantibus sit pax Domini nostri Jesu Christi quatenus hic fructum bone actionis percipiant et apud districtum Judicem premia eterne pacis inveniant Amen amen amen Symbolum Pontificis Adjuva nos Deus salutaris noster Ego Innocentius Catholice Ecclesie Episcopus subscripsi + Ego Romanus Diaconus Cardinalis Sancte Marie in Porticu subscripsi + Ego Gregorius Diaconus Cardinalis Sanctorum Sergii et Bacchi subscripsi + Ego Lucas Presbyter Cardinalis tituli Sanctorum Johannis et Pauli subscripsi + Ego Otto Diaconus Cardinalis Sancti Georgii subscripsi + Ego Guido Diaconus Cardinalis S Cosme et Damiani subscripsi Datum Valentie per manum Aimerici sancte Romane Ecclesie Diaconi Cardinalis et Cancellarii XVII Kalendas Aprilis Indictione X Incarnationis dominice anno MCXXXII Pontificatus vero Domni Innocentii Pape II anno III