Charter Document - 02330073
| Charter Number: | 02330073 |
|---|---|
| Cartulary Title: | Nouvelle Histoire de l'Abbaye Royale et Collégiale de Saint-Filibert et de la Ville de Tournus |
| Charter Language: | Latin |
| Charter Origin: | Religious |
| Charter Type(s): | Order |
| Date: | 1125 - 1132 |
| Date type: | Assigned |
| Resource Link(s): |
|
Charter:
Ego Ulgerius Andegavensis licet indigne dictus Episcopus per presentem paginam ad posteros transmittere curavi querelam quam diu habuerat Tornacensis Ecclesia adversus Canonicos S Dionysii Doadensis dictante sancto Spiritu penitus in conspectu parvitatis nostre et presentia Capituli nostri taliter esse finitam Concesserunt prefati Canonici venerabili Tornacensi Abbati Theodardo et omnibus successuris ei Abbatibus et Tornacensi Ecclesie et monachis ejus in perpetuum Ecclesiam Sancti Dionysii Doadensis cum omnibus ejus pertinentiis salvo jure Andegavensis matris Ecclesie Ita videlicet ut obeunte vel quocumque modo vacuata prebenda a Canonico Abbas Tornacensis alium inibi concessione Cunaldensis Capituli et legitimo consilio Canonicorum constitueret Qui prius quam prebenda uteretur Andegavensi [prout decet] presentaretur Episcopo et Archidiacono loci illius et Archipresbytero Numerus octo Canonicorum in senarium redigeretur ut ubi octo erant sex essent Canonici Due vero prebende scilicet septima et octava servata equa divisione sine servitore in jus et proprietatem cederent Abbatis Additum etiam fuit ut quotiescumque Abbas ad eos veniret a Roma regressus similiter et prima vice qua post consecrationem suam ad eosdem accederet eum in processionem reciperent Insuper in singulis annis duo de Canonicis in festo Annunciationis Sancte Marie Cunaldum venientes cum monachis sollemnitatem celebrarent et semel in singulis annis processionem suam quanto frequentiorem possent eodem conducerent Sane censum annuum viginti solidorum de Andegavensi moneta [qui pro Doadensi Ecclesia Capitulo S Mauritii solebat exsolvi] communiter de octo prebendis sumptum Canonici in festo Nativitatis Sancte Marie Culnaldi super altare solvent quos Prior Cunaldensis Capitulo S Mauritii in festo ejus reddet Dictum etiam confirmatum fuit ut si Abbas vel Prior Cunaldensis accederet in festo S Dionysii ad Ecclesiam Doadensem Missam dominicam celebraret et sicut dominus ab eis honoraretur Denique concessum fuit ex utraque parte ut quotiens illis obitus Tornacensium Abbatum cujuslibet seu Cunaldensium Priorum nunciatus fuerit debitum sine mora persolvent officium in vigiliis et Missis et signorum pulsatione nomina eorum in Martyrologio suo describent atque anniversarium per singulos annos sicut ecclesiastica consuetudo est sollemniter celebrabunt