Charter Document - 02330066
| Charter Number: | 02330066 |
|---|---|
| Cartulary Title: | Nouvelle Histoire de l'Abbaye Royale et Collégiale de Saint-Filibert et de la Ville de Tournus |
| Charter Language: | Latin |
| Charter Origin: | Religious |
| Charter Type(s): | Judgement |
| Date: | 1083 |
| Date type: | Assigned |
| Resource Link(s): |
|
Charter:
Wido Genevensis Dei gratia Episcopus omnibus tam clericis quam Episcopatus sui salutem et pacem in Christo Notum facimus vobis quoniam insurrexerunt contra Trenorcensem Ecclesiam et contra monachos ejus qui habitabant Perroii quidam malivoli susurrones et mendaces accusatores monachos predicte ville Ecclesiam acquisivisse pro pecunia simoniace et possidere sperantes hac occasione vel extorquere aliquid ab eis vel expulsis monachis fieri possessores possessionum eorum Quod cum pervenisset ad notitiam nostram ne falsitas opprimeret veritatem ecclesiastico more convocavimus ad Synodum nostram tam monachos quam accusatores ut audita utraque parte innocentes defenderemus falsatoribus licentiam super hac re in perpetuum interdiceremus Deo autem gratias quoniam ita deficit pars adversariorum ut nullus eorum auderet se presentare in Synodo et latrare contra monachos Quocirca precepimus episcopali auctoritate nostra ut monachi quieti maneant in possessionibus suis et a calumniatoribus suis nullam hujusmodi molestiam deinceps patiantur