Charter Document - 02330061
| Charter Number: | 02330061 |
|---|---|
| Cartulary Title: | Nouvelle Histoire de l'Abbaye Royale et Collégiale de Saint-Filibert et de la Ville de Tournus |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1096 |
| Date type: | Internal, Calendar, Feast, Papal |
| Resource Link(s): |
|
Charter:
In nomine sancte et individue Trinitatis Notum esse volumus presentibus et futuris ad quorum notitiam res illa pertinere videbitur quoniam ego Gaufredus Andegavensis Episcopus una cum filiis et fratribus nostris beati Mauricii Canonicis pacem et concordiam fecimus cum Petro Trenorciensi Abbate ac monachis suis super Ecclesiis Doadi castelli de quibus adversum nos diuturnam querimoniam habuerant que pax hujusmodi est Siquidem supradicti monachi clamorem suum contra nos super eisdem Ecclesiis ad aures Domini Pape Urbani cum esset Andegavis detulerunt dicentes prefatas Ecclesias Ecclesie sue juris ex regali dono antiquitus exstitisse cujus donationis chartam pre manibus habebant Unde jubente Papa statuto die Turonis in judicium convenimus ante Judices ad ipso Papa delegatos videlicet Hugonem Lugdunensem et Radulfum Turonensem Guidonem Viennensem et Hildebertum Bituricensem Archiepiscopos et Brunonem Signiensem Hoellum Cenomannensem Episcopos et Guilelmum electum in Arvernensem Episcopum et Adalbertum et Teuthonem Cardinales aliosque complures Auditis ergo utrisque partibus cum Judices ad dandam sententiam surrexissent ante ipsius judicii prolationem mediantibus eisdem Judicibus pax et concordia hec facta est Videlicet ut quicquid in prefatis Ecclesiis sive ex jure sive ex possessione habebamus aut alii a nobis totum ex integro Ecclesie S Philiberti et monachis suis traderemus et concederemus Quod et fecimus salva tamen subjectione et reverentia Andegavensis Episcopi et ministrorum ejus et justis consuetudinibus quas in aliis parrochialibus Ecclesiis habere videtur Habebamus autem tunc temporis in eisdem Ecclesiis calumniantibus tamen prefatis monachis ut a nobis et per nos quicumque ibi essent Canonici constituerentur et investirentur et nobis tanquam capiti suo subjicerentur et obtemperarent Hoc ergo eis concessimus eo tenore ut ipsi monachi Canonicis nostris per singulos annos in festo sancti Mauricii viginti solidos Andegavensis monete censualiter reddant ob memoriam videlicet concessionis nostre et tuitionis perpetue et mutue ad invicem concordie Hoc autem supradicte Ecclesie monachis ex concessione nostra licebit ut post mortem unius cujusque Canonicorum qui ad presens vivunt monachos quo eis placuerit numero substituant aut in proprio retineant Hoc autem ut firmius maneat scripto mandari jussimus quod manibus nostris firmavimus aliisque firmandum tradidimus Si autem aliqua persona magna vel parva [quod absit] huic nostre constitutioni calumniam inferre temptaverit iram Dei et Sanctorum ejus incurrat et calumnia ejus irrita permaneat et a sancte Ecclesie gremio eliminetur quousque ad emendationem veniat Signum + Marbodi Archidiaconi et Episcopi Redonensis S + Garnerii Archidiaconi S + Gaufredi Episcopi S + Wilelmi Archidiaconi S Goffredi Martini Decani S Huberti Precentoris S Herberti Canonici S Goffredi Canonici S Wilelmi Canonici S Alberici Canonici et capellani S Wilelmi Canonici Data Andegavis anno MXCVI Indictione IIII Nonis Aprilis feria VII ante Palmas IX anno Urbani II Pape Filippo Rege regnante Fulcone Comite Andegavensi Scriptum in sigillo figure ovalis Sanctus Maurilius Andegavensis Episcopus Et ipse S Maurilius in eodem est expressus dextra erecta quasi benedicens sinistra pedum pastorale gestans