Charter Document - 02330060

Urbanus Episcopus servus servorum Dei dilecto filio Petro Trenorciensi Abbati ejusque successoribus regulariter substituendis in perpetuum Pie postulatio voluntatis effectu debet prosequente compleri quatenus et devotionis sinceritas laudabiliter enitescat et utilitas postulata vires indubitanter assumat Quia igitur dilectio tua ad Sedis Apostolice portum confugiens ejus tuitionem devotione debita requisivit Nos supplicationi tue clementer annuimus et Trenorciense cenobium cui Deo auctore presides cum omnibus ad ipsum pertinentibus sub tutelam Apostolice Sedis excipimus Per presentis igitur privilegii paginam Apostolica auctoritate statuimus ut quecumque bona quascumque possessiones Catholicorum Imperatorum seu ceterorum Principum largitione Episcoporum concessione seu ceterorum fidelium oblatione ad idem cenobium inpresentiarum pertinent sive in futurum juste poterit adipisci firma tibi tuisque successoribus et illibata permaneant Decernimus ergo ut nulli omnino hominum liceat idem cenobium temere perturbare aut ejus possessiones auferre vel oblationes retinere minuere vel temerariis vexationibus inquietare sed omnia integre conserventur eorum pro quorum sustentatione concessa sunt usibus omnimodis profutura Cetera etiam que per reverende memorie Johannis Pape privilegium Trenorciensi monasterio confirmata sunt confirmamus Querelam autem monachorum S Florentii quam de Ecclesiis Lausduni sancte Crucis videlicet et S Nicolai contra te et Ecclesiam tuam faciunt quamque in presentia nostra Turonis habitam diligenter pertractavimus debito fine Deo auctore terminamus Apostolica iterum auctoritate precipientes quatenus deinceps nullam tibi vel Ecclesie tue molestiam ex his inferre presumant sed absque eorum inquietudine prefatas Ecclesias tuque successoresque tui jure perpetuo possideatis Si qua sane ecclesiastica secularisve persona contra hanc nostre constitutionis paginam venire tentaverit potestate honorisque sui dignitate careat et a sacratissimo Corpore ac Sanguine Domini nostri Jesu Christi aliena fiat quousque digna satisfactione resipiscat Cunctis autem eidem loco justa servantibus sit pax Domini nostri Jesu Christi quatenus et hic fructum bone actionis percipiant et apud districtum Judicem premia eterne pacis inveniant Amen amen amen Symbolum Pontificis Benedictus Deus et Pater Domini nostri Jesu Christi Ego Urbanus Catholice Ecclesie Episcopus subscripsi Datum Turonis per manum Johannis sancte Romane Ecclesie Diaconi Cardinalis XIII Kalendas Aprilis Indictione IIII Incarnationis dominice anno MXCVI Pontificatus autem Domini Urbani secundi Pape VIII