Charter Document - 02330051
| Charter Number: | 02330051 |
|---|---|
| Cartulary Title: | Nouvelle Histoire de l'Abbaye Royale et Collégiale de Saint-Filibert et de la Ville de Tournus |
| Charter Language: | Latin |
| Charter Origin: | Religious |
| Charter Type(s): | Foundation |
| Date: | 1060 |
| Date type: | Internal, A.D., Regnal |
| Resource Link(s): |
|
Charter:
Sepe contingere solet ut bene gesta parentum perturbet successio posterorum dum de rebus Ecclesie Dei collatis minus sufficiens adhibetur testium cautela vel non superest charta vivacior Ea propter ego Isenbertus per patientiam Dei Pictavensis Episcopus donationem cujusdam Militis parrochiani nostri Hugonis scilicet nobilissimi et devotissimi viri quam monachis Trenorchiensibus in Ecclesia Beate Marie Lausdunensis divinas excubias celebrantibus tam spontaneus quam devotus obtulit firma in perpetuum fore modis omnibus volui et presentem paginam sigilli nostri charactere communivi Placuit itaque prefato Hugoni ut Ecclesias tres quas in castro Lausdunensi de feodo gloriosissimi Principis Gaufredi Comitis Andegavensium tunc temporis tenere videbatur memoratis fratribus Trenorchiensibus nimirum monachis pro redemptione anime sue et Arsendis uxoris sue et filiorum suorum Hugonis scilicet atque Teobaldi liberali et munifica manu condonaret Sunt autem Ecclesie tres altera Parrochialis in honorem beati Petri Apostoli infra muros castri Lausdunensis relique vero due extra muros posite quarum altera in honorem gloriose Virginis et Matris tertia vero Beati Baptiste Johannis nomine consecrate sunt quas tota mentis alacritate cum propriis oblationibus quarumlibet rerum et baptisterio et lege debita sepulture cum singulis denariis singulorum Sacramentorum servis Dei monachis a supradicto Hugone suppliciter rogatus in manu venerabilis viri Guilelmi Trenorchiensis cenobii Abbatis integraliter iterum iterumque concedo atque confirmo Ventas etiam quas teloneum dicunt de diversis quibuslibet rebus singulis Dominicis diebus a primo signo quo vespertina diei Sabbati pulsatur hora usque ad finem sequentis Dominici diei et eo modo per singulas beati Petri festivitates et ante festivitatem beati Johannis Baptiste die que Mercurii nuncupatur supradictis monachis liberaliter valde contradidit Nec minus quoque concessit memoratis fratribus quicquid ab heredibus propriis vel jure emptionis vel ipsorum heredum largitione in posterum sibi poterint adquirere Pro his igitur que premisimus beneficiis Ecclesie sancte collatis et pro salute Gaufridi illustrissimi Comitis Andegavensium cujus consilio et voluntario assensu presens donatio facta est concesserunt monachi Lausdunenses ut omnibus diebus usque in perpetuum pauperem unum cibo et potu sufficienter reficiant Quod si pauper idem recesserit vel obierit alium loco ejus eodem modo substituent Sed et annuatim pro prefato Hugone et uxore ejus Arxende et filiis ejus Hugone et Teobaldo sicut pro monachis professis debitum anniversarium celebrabunt et nomina eorum in Martyrologiis suis conscripta perenniter retinebunt Si qua vero ecclesiastica secularisve persona prefatam elemosinam quolibet modo perturbare vel super hoc monachos inquietare temptaverit in extremo die judicii divina se noverit anathematis animadversione feriendum Ego Hugo hujus patrator donationis manu propria confirmans libens subscripsi Ego Teobaldus filius ejusdem Hugonis manu propria libens subscripsi Ego Isenbertus Pictavensis Episcopus manu propria subscripsi et sigilli nostri charactere communivi Ego Gaufridus Comes Andegavensis manu propria subscripsi et presentem chartam impressione sigilli nostri sollemniter roboravi Actum publice Lausduni per manum nostram presente et collaudante Gaufrido prestantissimo Andegavensium Comite anno ab Incarnatione Domini M sexagesimo regnante Heinrico victoriosissimo Francorum Rege anno XXX Philippo vero filio ejus anno primo celebriter imperante + Signum Comitisse Adelaidis Teutonice S Oddonis filii Comitis Stephani Blesensis S Oddonis de Castro Radulfi S Johan de Castro Fessa S Alberti Prepositi de Monsorel S Gaufredi de Insula S Radulfi de Pullia []