Charter Document - 02330012

In nomine sancte et individue Trinitatis Karolus gratia Dei Rex Decus regie majestatis nullum majus est quam loca Sanctorum amplificando sublimare et servis Dei in ipsis Deo devote famulantibus quibuslibet necessitatibus sive oppressione paganorum compulsis ob eterne beatitudinis remunerationem clementer succurrere et pro amore superne retributionis misericorditer subvenire Quapropter divine admonitionis igne succensi et salutifero fomite inspirati ad presentis vite instantiam felicius percurrendam et ad perpetue felicitatis gaudia facilius obtinenda hoc fore certissime non dubitantes omnibus optimatibus ac ceteris fidelibus regni nostri presentibus scilicet atque futuris litteris regie auctoritatis nostre innotescimus ob id quia serenitatem altitudinis nostre venerabilis et carissimus nobis Geilo Abbas ab infestatione paganorum per plurimas necessitates Fratrum sancte Marie et sancti Filiberti Herensis monasterii humiliter deprecans ut eorum necessitatibus succurre remus patefecit Nimium dolore perculsi et instinctu celestis gratie moniti verum etiam ejusdem venerabilis Abbatis famulatu placati eidem monasterio Herensi ipsisque Fratribus sancte Marie et beati Filiberti per testamentum regie auctoritatis nostre Abbatiam sancti Porciani in pago Arvernensi cum omnibus ad se pertinentibus sive ad id jure respicientibus tam in eodem pago quam et in aliis sicut ad nostrum habere visi sumus perpetim habendam tradimus et condonamus ac demum ad dominationem illorum solemni more transferimus ut quandiu persecutio Normandorum invaluerit eandem Abbatiam sancti Porciani jam dicti Fratres [possideant] nec huc illucque vacillantes discurrant ad locum refugii congratulantes aptum Et licet incerti simus cum illis Domino annuente pax et tranquillitas in dicto monasterio Herensi nullo imminente turbine Normandorum data fuerit prenominatam Abbatiam sancti Porciani sicut alias res proprias suprascripti monasterii Herensis quo indigentiam non modicam aliquantulum evadere et divinum officium liberius explere possint absque cujus piam contradictione sive repetitione eternaliter possideant Quare hoc magnitudinis et celsitudinis nostre preceptum fieri et illis dari jussimus per quod decernentes sancimus atque precipientes delegamus ut jam dicti Fratres sepius nominatam Abbatiam sancti Porciani secundum quod eis visum fuerit jure proprio et more ecclesiastico sicut alias suas res proprias perpetualiter ad suos usus suorumque utilitates ordinantes disponant et disponendo ordinent eo videlicet modo ac tenore ut pro nobis et pro conjuge ac prole nostra simul etiam pro statu regni ac populi a Deo nobis commissi salute clementiam Dei devotissime exorent Ut autem nostre auctoritatis largitio pleniorem in Domino obtineat firmitatis vigorem manu nostra propria subter eam scribendo corroborantes anuli nostri impressione adsignare jussimus Signum Karoli gloriosissimi Regis Adalgarius Notarius ad vicem Gausleni recognovit Data III Kal Novembris indictione IV anno XXXII regnante Karolo gloriosissimo Rege Actum Camlimptum in Dei nomine feliciter amen