Charter Document - 02330001

In nomine Domini Dei et Salvatoris nostri Jesu Christi Hludovicus divina ordinante providentia Imperator Augustus Notum sit omnium fidelium nostrorum presentium scilicet et futurorum sagacitati qualiter vir venerabilis Arnulfus Abbas ex monasterio sancti Filiberti quod est situm in insula que dicitur Eri propter incursiones barbarorum qui frequenter ipsum monasterium depopulantur foras in pago qui dicitur Erbadellicus in loco cujus vocabulum est Deas per nostrum consensum atque adjutorium novum monasterium edificasse et ob commoditatem ejusdem monasterii et Congregatione ibidem degenti ex fluvio qui dicitur Bedoniam aquam ibi velle perducere obsecrans clementiam Excellentie nostre ut transitum ei per viam regiam quam stratam sive calciatum dicunt eidem aque concederemus qualiter ad predictum monasterium nostris et futuris temporibus absque alicujus impedimento venire potuisset Et in eodem loco velle pontem facere ut transeuntibus nihil impedimentum esset Cujus petitioni quia justa et predicto monasterio utilis esse videbatur adsensum prebuimus et licentiam aqueductum per predictam stratam esse tantum ut pons desuper talis fieret qui transeuntibus nihil obesset concessimus Idcirco precipimus atque jubemus et nullus quilibet nostris nec futuris temporibus aliquod obstaculum aut impedimentum vel calumniam rectoribus predicti monasterii de predicto aqueducto facere aut ingerere presumat sed absque ullius infestatione hoc quod nos concessimus ratum et stabile omni tempore permaneat Et ut hec nostra jussio omni tempore stabilis et inconvulsa permaneat de anulo nostro subter jussimus sigillari Ego Durandus Diaconus ad vicem Helizachar recognovi et subscripsi Data XVII Kalendas Aprilis anno Christo propitio VI imperii Domni Hludovvici piissimi Augusti Indictione XII Actum Aquis Grani palatio in Dei nomine feliciter Amen