Charter Document - 02290204
| Charter Number: | 02290204 |
|---|---|
| Cartulary Title: | Chartularium prioratys beatae mariae de Paredo monachorum [Paray-le-Monial] |
| Charter Language: | Latin |
| Charter Origin: | Lay |
| Charter Type(s): | Agreement |
| Date: | 1300 |
| Date type: | Assigned |
| Resource Link(s): |
|
Charter:
Priscorum patrum sanctitum constat institucionibus ut quisquis cupit et preoptat per longiora temporis curricula aliqua illibata et inconvulsa existere necessario faciat ad multorum noticiam et agnitionem devenire non enim ea debent contegi et supprimi silencio que multorum necesse est confirmari et approbari judicio Unde non opinor alicui officere immo multorum utilitati proficere si summatim dicatur qualiter domnus Girardus de Copetra prior hujus loci hanc domum in adquirendis terris et aliis necessariis dilataverit et ob memoriam sui in evo hoc in loco habendam quanta de fratre suo Gausceranno de Copetra emerit et adquisierit Dedi itaque ego Gauscerannus de Copetra suasione et amore fratris mei Girardi prioris tunc Paredi Deo et monachis ejusdem loci quicquid in villa Paredi habebam vel querebam juris dominationis et possessionis scilicet panem et vinum quod de domo monachorum accipiebam et domum meam de Vico et omnes homines et feminas liberos et servos et ancillas preter duos tantum Amicum et Piscem quos ad serviendum mihi viventi retinui tali scilicet pacto ut post mortem meam monachis sint ipsi et omnis progenies eorum et preter hoc quod de vino meo proprio et annona portagium non accipietur cetera omnia sine aliqua retentione dedi Deo Similiter quicquid in villis de Moncellis de Lavarenis de Zucdebulda habebam cum omnibus appendiciis et usuariis homines et feminas liberos et servos et ancillas terras prata nemora et omnem justiciam et dominationem preter terram Gausceranni de Moregne et vicariam de terra Bernardi de Anglars homines quoque qui de his terris exierunt ubicumque sint sive liberi sive servi postquam ad terras supradictorum monachorum redierint huic dono concedo Simili modo quicquid in campo Bertem et in Rumanues habebam prata terras et nemora et justitiam cum omnibus appendiciis et usuariis suis dedi preter decimum quod est de Volabro et servum unum Bernardum sunt autem nemora hujus doni denominata Garenio Beci due silve juxta forestam monachorum et vauram Caninam et vauram Bertas similiter terram de Tronce quam tenet Dulcet et heredes ejus que debet VI denarios Aucta sunt autem hec per manus domni Willelmi comitis Cabilonensis qui responsor ex parte Gausceranni est de pace Testes vero sunt hujus doni ipse Willelmus comes Girardus de Digonia Wido de Curte Atto de Copetra Jotcerannus de Petra Campi Petrus de Fracto Puteo