Charter Document - 02280054

Le xx jour de mars l'an mil six cens quarante six avant midy furent presens R P Dom Belin prieur claustral et Sebastien du Chastel procureur et cellerier au prieuré et couvent Saint Estienne de Nevers tant pour eux que pour les autres religieux dudit prioré comme ayans les droicts cedez de messire Claude Molnourry conseiller du Roy en ses conseils maistre des requestes ordinaire de son hostel abbé de Gailliac prieur et seigneur commandataire dudit prioré Saint Estienne ledit droict cedé pour la moitié pour survenir a leur portion et entretien avec autres droicts aussy par luy a eux cedez et vénérable personne Me Jehan Rappeaux vicaire perpétuel dudict Saint Estienne aussy comme ayant droit et cession des prédécesseurs dudit sieur prieur dudit droict aussy cy aprez declaré et qui luy auroit esté delaissé pour survenir a l'entretien de sadite qualité de vicaire perpétuel pour l'autre moitié d'autre part Lesquels ont recogneus et confessez recognoissent et confessent avoir eu et receu de Christophe Desprez escuier demeurant en la paroisse de Saint Jehan de Lichy fil et héritier de deffunct Guillaume Desprez escuier seigneur de Cougny Roches et l'Espéron son pere present stipulant et acceptant la somme de trentetrois livres procedante de biens de l'hérédité dudict deffunct et ce pour raison du lict et garniture d'icelui des nobles qui deceddent en ladite paroisse de Saint Estienne qui appartient audit sieur prieur et dont il est en possession immémoriale comme estant ledict deffunct sieur de Cougny decédé en ladite paroisse le unziesme jour du présent mois et an en la maison de Me Claude de Méru advocat située en la rue de Mirangron et du Carreau de ladite paroisse et censive et cy devant justice dudit Saint Estienne de laquelle somme de trente trois livres lesdits sieurs religieux et Rappeaux ont cheny et composé avec ledit sieur Desprez pour ledict droict luy ayant remis le surplus dudit droit et a ses cohéritiers et dont ils sont contens et l'en quittent Car ainsy faict a Nevers audit prieuré de Saint Estienne les an et jour susdits présents Guillaume Ferré practixien et Michel Cassiat clerc audit Nevers tesmoings