Charter Document - 02280050
| Charter Number: | 02280050 |
|---|---|
| Cartulary Title: | Les Chartes de Saint-Etienne de Nevers |
| Charter Language: | French |
| Charter Origin: | Religious |
| Charter Type(s): | Decree |
| Date: | 1461 |
| Date type: | Internal |
| Resource Link(s): |
|
Charter:
A tous ceux Jehan Baudereul pardevant Jehan Pondelune et Guillaume de Milan le iv avril MCDXLI heures de trois et quatre après midy fust present en sa personne religieux et honneste homme Fr Guillaume Nanty licencié en droict prieur du prioré Saint Estienne de Nevers et tout le couvent de ladite eglise en procession tous revestus en aulbes et chappes avec la croix et l'eaue beniste près de la porte de la Barre dudit Nevers où ils estoient attendant révérend père en Dieu messire Pierre de Fontenay docteur en loiz et en droict par authorité de Nostre Saint Père le Pape evesque de Nevers ainsy qu'on avoit accoustumé faire aux evesques de Nevers à leur première entrée et réception pour faire certains juremens audit prieur et couvent de Saint Estienne accoustumé de faire et lesquels sermens estoint contenus en certain livre escrit en parchemin que ledit prieur tout revestu tenoit en ses mains et ainsy que ledit révérend fust de prez arrivé avec sa compagnie à ladite porte ledit prieur luy baillia la croix il reçeut et adora et après ce le livre où estoint contenus les articles dudit serment ledit prieur luy présenta et lesdits articles par ledit révérend leus tenus et visittés promit et par serment jura les garder et entretenir et faire garder selon le contenu d'iceux et avec le tout ainsy comme ses prédécesseurs evesques de Nevers l'ont promis et juré faire