Charter Document - 02280046

A touz ceux qui ces presentes lettres verront Regnaud de la Durère garde du scel le roy nostre sire en la prevosté de Saint Pierre le Moutier salut Sachent que l'an de grace mil trois cens quatre vingts et trois le mercredy avant la Pentecoste environ heure de prime Jehan Delafond sergent du roy nostre sire en la presence de Vincent Compain de Brinon clerc notaire juré dudict scel auquel quant à ce nous avons comis nostre pouvoir et des tesmoings cyaprès escripts fust present à l'entrée de la porte de la Barre de Nevers par dedans la ville auquel estoint M le prieur de Saint Etienne et plusieurs ses moines et M Regnaud de La Roche chevalier capitaine de Nevers avec plusieurs autres ses complices auquel capitaine dict et expousa ledit sergent telles parolles ou semblables en effect Monsieur le capitaine et tous aultres qui estes cypresentz je vous signiffie et fais asscavoir que j'ay maintenu et gardé et encores maintiens et garde de par le roy nostre sire M le prieur qui cyest et son couvent en la possession et saisine de ceste porte de la Barre en la justice et seigneurie du bourg Saint Estienne de Nevers et appartenances et vous deffent à tous à peine de cinq cent marcs d'argent applicqué au roy nostre sire qu'en la possession et saisine desdites choses vous ne molestiez ou travailliez lesdits prieur et couvent et se aulcune chose a esté par vous faitte au contraire je vous faict commandement à ladite peine que vous le remettez au premier estat que dessus et vous certifie qu'en signe de ce je mis les penonceaux du roy nostre sire en laditte porte Par lequel capitaine fust respondu qu'il se garderoit bien de mesprendre et de faire offense au roy nostre sire desquelles choses ledit sergent requist lettres de tesmoingnage audit juré qui ainsy le nous a rapporté Et nous à sa relation et en tesmoing de ce avons mis et appousé le scel du roy nostre sire à ces presentes Faict et donné l'an et jour dessusdicts presents Michel Charbonnier Jehan de Germigny et plusieurs autres