Charter Document - 02270104

Novi casus novas faciunt institutiones Inde est quod quia abundat cupiditas et jam non oritur veritas inter fratres sed moritur dignum duximus in ecclesia ista statuandum de consilio domini Bernardi Nivernensis episcopi et Hugonis decani et assensu totius capituli ut quicumque canonicus ecclesie hujus capitulo suo aliquid censualiter debuerit termino statuto reddere non differat sive cautionem sive denarios seu vinum Quod si absque licentia decani et capituli videlicet non duorum vel trium sed ad minus cotidianorum ultra terminum quod debet reddere distulerit de potentia nostra ut non statim fratrem nostrum erubescere faciamus octo dies ei post terminum ad penitentiam et emendationem relinquimus Quod si nec etiam usque ad octavum diem reddiderit de octavo in antea sub vinculo anathematis interdicimus ne illo tali in choro existente servitium aliquod in cantu vel in psalmis celebretur Quod sit iterum propter hoc non erubuerit sed potius novissima hominis illius pejora fuerint prioribus de quindena post terminum in antea redditus prebende sue si aliqui interim fuerint sine spe recuperationis amittat Addimus etiam quod quamdiu fuerit infra parietes totius ecclesie nostre aliquod divinum officium inibi nullatenus celebretur Hoc autem firmissime tenendum statuimus donec reddat universum debitum usque ad novissimum quadrantem Quod vero dictum est de quindecim diebus in antea tam de absentibus quam de presentibus irrefragabiliter teneatur Sed si absentes peregrini fuerint quod fieret de eis fiat de vicariis eorum Vicarium vero in reddendo statutos redditus non nisi canonicum ejusdem ecclesie esse censemus Si quis vero cartam istam nisi meliori et saniori domni episcopi et totius capituli consilio infringere presumpserit vel in choro cantando dum ille talis in eo de octavo die in antea extiterit vel de quindecim diebus post terminum in antea dum in tota ecclesia fuerit vinculo anathematis sicut statuti generalis transgressor donec ad debitam veniat satisfactionem se sentiat involutum Facta est hec institutio III Idus febroerii Ind XI anno ab incarnatione domini MCLX