Charter Document - 02270097
| Charter Number: | 02270097 |
|---|---|
| Cartulary Title: | Cartulaire de Saint-Cyr de Nevers |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 0894 |
| Date type: | Internal, Regnal |
| Resource Link(s): |
TELMA - Chartae galliae Archives départementales de Saône-et-Loire - G 198 (p43) |
Charter:
In nomine Domini Dei eterni et salvatoris nostri Jesu Christi Odo clementia Dei rex Si ea que nostri inter se fideles loci temporisve commoda opportunitate ex rebus propriis aut jure beneficii sibi commissis causa augmenti vel meliorationis juste ac legaliter agendum deliberaverint nostris confirmamus edictis regie nimirum celsitudinis morem persequimur idque ad regni nobis divinitus collati tutelam proficere non dubitamus Ergo cunctorum sancte Dei ecclesie fidelium nostrorum que tam presentium quam et futurorum sollertia noverit qui adiens nostre presentiam serenitatis Franco venerabilis episcopus sancte matris ecclesie Nivernensium que constructa ac dedicata noscitur in honore ac nomine preciosi martiris Christi Cyrici humiliter petiit ut quamdam precariam quam cum Roccone fidele nostro cum assensu fratrum Christo inibi militantium ex rebus jam dicti sancti Cyrici sanctique Martini fecerat precepto nostre eminentie confirmare dignaremur Sunt autem he res quas jam dictus Franco episcopus memorato Rocconi dat in pago Matisconensi in villa Fisciaco de potestate sancti Cyrici mansos vestitos cum terra apsa ad ipsam potestatem in eadem villa aspiciente et in villa Circiaco mansos duos vestitos in villa quoque Novert de potestate sancti Cirici mansos III apsos de rebus sancti Genesii eque mansos tres apsos in pago etiam Nivernensi in villa Dulon ex rebus sancti Franchovei mansos IIII apsos vero de potestate sancti Aniani mansos III apsos et in pago Cabillonensi villa Cacenato de rebus sancti Cyrici mansos quatuor apsos de ratione vero sancti Martini in villa Montis ecclesiam cum mancipio uno terramque ad ipsam pertinentem vestita una Pro hac vero rerum prestaria concessione confert prefatus Roco suprascripte matri ecclesie ex rebus propriis in pago Matisconensi in villa Colonias mansum unum et in Luviniaco mansum unum eo jure ut tam ipse quam conjux ejus Guarva eorumque infantes Raculfus scilicet et Leutrada usu fructuario in sua habeant vita annisque omnibus in festivitate sancti Martini solvant rectori sancte ecclesie prescripte pro censu solidos decem postque eorum discessum utreque res meliorate revertantur cum omni integritate ad potestatem sancti Cyrici Faventes itaque libentissime precibus memorati episcopi hoc nostre sublimitatis preceptum fieri jussimus per quod precipimus atque jubemus ut istam dispositionem prescripti episcopi sepe dictus Roco cum uxore et nominatis infantibus adscriptas res salvo per omnia jure ecclesiastico teneat atque usu fructuario possideat Et ut hoc nostre auctoritatis preceptum validius in Dei nomine per tempora supervenientia subsistere valeat manu ipsum propria subter firmavimus nostroque annulo sigillari jussimus Signum Odonis gloriosissimi regis Data V idus julii indictione XII anno VII regnante Odone gloriosissimo rege