Charter Document - 02270075

In nomine Jesu Christi filii Dei vivi Notum sit omnibus sancte matris ecclesie filiis tam presentibus quam eorum posteris quod ego Hugo sola Dei gratuita bonitate non mei recompensatione meriti sancte Nivernensis ecclesie episcopus licet indignus testamentum de bonis que michi de episcopatu proventura sunt ad laudem Dei et honorem institui precipio et quemadmodum quelibet persona laicalis uxorem sibi legitime junctam juxta mundane legis traditionem dotat de bonis suis terrenis et honorat ita ego sponsam mihi spiritualiter junctam hanc videlicet ecclesiam de bonis meis supradictis bona voluntate et bono corde doto secundum traditionem sanctorum canonum et honoro tali videlicet modo ut quandocunque michi ex Dei voluntate de hac vita caduca migrare contigerit medietas bonorum meorum de episcopatu tam in pane quam in vino auro et argento et bestiis omnique et supellectili tam persoluto prius si quod fuerit tunc temporis meo debito canonicis Deo sanctoque Cyrico die noctuque servientibus ex meo jussu et dono tribuatur altera vero bonorum medietas rursus per medium dividatur quorum unam partem peregrinis et viduis in domo Dei infirmantibus partem vero alteram monachis in monasterio sancte Marie sanctique protho Stephani in suburbio nostre civitatis servientibus erogari precipio in quo scilicet monasterio michi sepulture locum elegi siquidem in hoc vel Altissiodorensi episcopatu michi obitus evenerit Si quis vero alio modo fecerit vel hujus testamenti ratam firmationem aliquatenus violare presumpserit disperdat illum Deus et ex divina auctoritate et nostri ministerii potestate anathematis sub vinculo tandiu teneatur quoad usque Deus in hac presenti vita acriter in eum ulciscatur et respondeat clerus et populus fiat fiat Recitatum est hoc testamentum in civitate Nivernis in ecclesia sancti Cyrici anno Dominice Incarnationis MLXXIIII indictione XII in Calendis novembris feria VII quando idem episcopus Hugo in sede pontificali inthronizatus est astantibus et audientibus Goffrido Autissiodorensi episcopo et Willelmo comite aliisque primatibus multis una cum clero et populo civitatis Recitatum est autem secundo in sequenti septimana in plena synodo Rainerius vero dictavit precentor ecclesie et scripsit regnante Philippo rege Francorum