Charter Document - 02270072
| Charter Number: | 02270072 |
|---|---|
| Cartulary Title: | Cartulaire de Saint-Cyr de Nevers |
| Charter Language: | Latin |
| Charter Origin: | Religious |
| Charter Type(s): | Decree |
| Date: | 1075 |
| Date type: | Assigned |
| Resource Link(s): |
|
Charter:
In nomine Domini Ego tertius Hugo Nivernensis episcopus notum volo fieri omnibus sancte matris ecclesie filiis tam presentibus quam eorum posteris quod canonici hujus loci ante presentiam meam multotiens venerunt humiliter cum omni devotione postulantes quatinus quasdam consuetudines quas in villa eorum quadam que vocatur Viringia habeo eis dimitterem Quod cum ego scirem predictas consuetudines ab antecessoribus meis videlicet Rocleno aliisque quibusdam injuste fuisse impositas timui ne si in peccato illo manerem periculum anime incurrerem Unde petitioni eorum adquiescens bono corde et bona voluntate pro salute anime mee et antecessorum meorum omnes consuetudines quas inibi habere videbar dimisi eis et dimitto concessi et concedo ita scilicet ut nullus meorum servientium ibi deinceps aliquid capere audeat vel presumat et si quis presumpserit iram Dei incurrat Rogo autem per gratiam Dei successores meos episcopos ut hanc dimissionem temporibus suis concedant et teneant et servientes suos in predicta villa nihil capere dimittant scientes quod Deus est vindex eorum qui tales invasiones faciunt Illos autem rusticanos qui in eadem villa mansiones habuerint volo et precipio habere et tenere per loca mea id usuarium quod prius habuerunt et tenuerunt Facta sunt hec omnia supradicta Nivernis publice Girardo preposito jubente atque laudante cum filio suo Raginaldo Hi etiam laudaverunt et dimiserunt portiunculam quam ibi videbantur habere vidente Hugone de Luperciaco Guido de Donziaco Guido Vermilio Raginaldus filius Rotberti