Charter Document - 02270038
| Charter Number: | 02270038 |
|---|---|
| Cartulary Title: | Cartulaire de Saint-Cyr de Nevers |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 0850 |
| Date type: | Internal, Calendar, Regnal |
| Resource Link(s): |
|
Charter:
In nomine sancte et individue trinitatis Karolus gratia Dei rex Si sacerdotum Dei petitionibus maxime in ecclesiasticis utilitatibus benignum assensum prebemus regiam consuetudinem exercemus ac per hoc facilius nos eternam beatitudinem adepturos procul dubio confidimus Itaque notum sit omnibus sancte Dei ecclesie fidelibus nostris presentibus atque futuris quia venerabilis vir Herimannus Nevernensis ecclesie episcopus culminis nostri adiens sublimitatem innotuit qualiter ministerii sui opus exercens pastorali officio providerit utilitatibus ecclesie sibi commisse et quomodo de facultatibus ejusdem ecclesie deputaverit quasdam villas usibus et stipendiis Deo servientium canonicorum suorum tam infra civitatem consistentium quam etiam in aliis monasteriis sue sedi appendentibus sive subjectis degentium quatenus sine mordacis inopie sollicitudine secundum canonicam et regularem institutionem interius et exterius victu tegumentoque contenti Deo valeant militari Unde etiam testamenti scriptum faciens propriaque manu roborans sanctorum patrum episcoporum scilicet regni nostri pro utilitate sancte Dei ecclesie octingentesimo quadragesimo nono anno Incarnationis Domini nostri Jesu Christi et regni nostri nono in die nonarum novembris Parisius convenientium auctoritate studuit confirmari Itaque humiliter petiit ut eamdem imprevaricabilem auctoritatem precellentie nostre precepto regaliter corroboraremus Videlicet ut devotionis et sacre voluntatis participes de excessibus nostris divine pietatis munere facilius indulgentiam consequi mereamur ejus inquam petitionem clementer audisse et libentissime exaudisse cunctis notum esse volumus Quare altitudinis nostre scriptum hoc fieri jussimus per quod constituimus et firmamus ut sicut immemorata a sanctis patribus presulibus regni nostri confirmato privilegio continetur quicquid superius nominatus venerandus episcopus Herimagnus ex facultatibus et villis episcopatus sui tam clericis sedis sue quam et aliis per cellas eidem ecclesie sue subjectas canonicis et monachis et sanctimonialibus deputavit et quidquid preterea ex rebus sue proprietatis ad augmentum stipendiorum ipsorum addidit secundum ejus rationabilem constitutionem nostris et futuris diebus maneat firmum et inconvulsum nullique liceat presentibus aut futuris temporibus secundum eamdem laudabilem institutionem exinde aliquid invertere aut immutare quatenus tantorum sanctorum virorum consensio ex futurorum fidelium assensu in omnibus seculis semper confirmata laudetur Ut autem hec magnitudinis nostre confirmatio in Christi nomine meliorem obtineat vigorem de anulo nostro super eam jussimus sigillari Signum Karoli gloriosissimi regis Eneas notarius ad vicem Ludovici recognovit Datum IX kalendas junii indictione XIII in anno X regni Karoli gloriosissimi regis Actum in Vermeria palatio regio in Dei nomine feliciter Amen