Charter Document - 02270036

Si quis Christianorum ecclesiasticas possessiones tam mobiles quam immobiles aut temeritate pervastas aut furto sublatas aut etiam a se male ordinatas in vita sua meminerit illud terrore ultimi examinis emendare studeat quo sanctos Dei quorum nominibus ecclesie dedicate sunt non contrarios sed sibi propitios adquirat Quocirca ego in Dei nomine Bertrannus presbyter offensionum et culparum memor quas ex thesauro sancti Cyrici michi cum ipso peregi pro emendatione tanti commissi eidem sancto Cyrico cujus canonicus licet indignus existo dono donatumque in perpetuum esse volo res mee hereditatis in pago Nevernensi et in villa Puliaco sitas mansum videlicet meum indominicatum cum supraposito et hortili et vinea ibi adherente qui terminatur ita in uno latere vinea Adaldranni in alio latere semita pedualis in una fronte vinea Stephani et Johannis in alia fronte via publica Infra has terminationes hunc mansum post vite mee finem predicto sancto Cyrico sicut dixi condono ut in vita mea eum teneant et singulis annis sancti Cyrici festivitate denarios duodecim ex censu thesauro ipsius persolvant Dono etiam illi per eandem causam alium alodum meum in eadem villa Puliaco in loco qui dicitur Calmis sicut de Bernoeno presbytero eum adquisivi et quicquid ibi visus sum habere eo tenore ex isto servato ut Berno quidam meus clericus per manu firmam quam inde habet in vita sua teneat et annuatim festivitate sancti Cyrici solidos duos ex censu reddat Et quoniam pro emendatione thesauri hec sancto Cyrico persolvere cupio confirmando statuo ut hujus terre fructum cum predicto censu secretarius ipsius ecclesie silicet sacrarum reliquiarum custos omni tempore colligat et singulis annis quicquid arramenti facere potuerit ex ipso thuribulum scilicet aut calicem patenamque aut etiam candelabrum aut iis similia que ab episcopo et clericis loci illius videbuntur esse cariora et utiliora fabricare studeat Qui si ex hoc neglegens aut quadam incuria renuens apparuerit major thesaurarius statim illum recipiat et hec predicta omnia compleat Quod si idem simili incuria aut neglegentia detentus fuerit episcopus qui omnibus ministeriis ecclesie officiisque preest cuique ex hac causa majus pondus inheret ista omnia completurus eum denuo recipiat et neque ipse aliquis christianorum ipsum beneficiare nec commutare nec aliter quam statutum est deflectere presumat Si vero quelibet persona hanc terram ab hoc proposito annue emendationis subducere voluerit iram omnipotentis Dei et sancti Cyrici damnatus penas inferni jugiter sustineat et ad ultimum quod tentaverit vindicare non valeat Signum Bertradi presbyteri qui hanc cartam donationis fieri et firmare rogavit S Dacberti S Gibaldi S Acmardi S iterum Dacberti S Ricaudi S Ermengaldi S Tecberti S Garnerii Tetgerius levites scripsit et datavit in mense julio anno XIII regnante Loterio rege