Charter Document - 02270015
| Charter Number: | 02270015 |
|---|---|
| Cartulary Title: | Cartulaire de Saint-Cyr de Nevers |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 0886 |
| Date type: | Internal, Calendar, Regnal |
| Resource Link(s): |
|
Charter:
In nomine sancte et individue trinitatis Karolus Dei gratia imperator Augustus Si imperialis sollicitudo ea procuret que ad instaurationem sancte ecclesie catholice pertinere noscuntur sine dubio magnum imperii culminis statum preparare comprobatur et non solum in presenti stabilimentum regni et imperii corroborat sed etiam in futuro eterne retributionis premium sibi conciliat Sit ergo cognitum cunctis fidelibus sancte Dei ecclesie tam presentibus quam futuris quoniam Willelmo comite adeunte nostram celsitudinem exhortati sumus ab ipso et deprecati ut ad memoriam reduceremus inviolatam patris sui Bernardi fidelitatem et pro memoria nostri nominis et pro redemptione anime patris sui Bernardi comitis ecclesie sancti Cyrici cui Emmenus presidet episcopus Isodro abbatiam sancti Petri sitam in Augustudinensi comitatu et cellam sancti Reveriani beatissimi martyris sub presenti testamento in dispositione Nevernensis episcopi subditas constitueremus Consilio autem adhibito cum consiliariis nostris rememorantes cum quanta fiducia et animi virtute et permanenti fidelitate Beanardus gloriosus comes et marchio se opposuerit contra hostes nostros et insidiatores ac devastatores regni contra Bosonem tyrannum et sequaces ejus et quam prompto animo mori in bello contra supradictos infideles pro excellentia nostre fidelitatis pugnans amaverit decentissimum reperimus ut quod filius ejus Willelmus comes et marchio postulabat exsequeremur Precepto igitur proprie auctoritatis et confirmationis res supradictas cellulam sancti Reveriani beatissimi martyris sitam in Nevernensi comitatu cum omnibus appendiciis suis villis silvis et campis pratis et ecclesiis et mancipiis Isodro etiam sancti Petri abbatiam sitam in Augustudinensi comitatu simili modo cum omnibus suis reditibus sibi pertinentibus Deo et beato Cyrico martyri et presidibus ipsius ecclesie ad possidendum et disponendum et dominandum subjugamus ut indulgentiarum Dominus nobis et illi fideli nostro si in aliquo deliquit contra rectores ipsius ecclesie Nevernensis in futuro de omni excessu reatus dignetur esse propitius Deinde hoc decretum largitionis nostre ut perseveranti auctoritate consistat subtus propria manu signavimus et impressione anuli nostri precipimus sigillari Signum Karoli gloriosissimi imperatoris Augusti Amalbertus notarius ad vicem Liugardi recognovi Actum XV Kalend Septembris anno V regnante domno Karolo imperatore in Francia in Italia IV indictione VI feliciter