Charter Document - 02270001

In nomine sancte et individue trinitatis Karolus gratia Dei rex Si igitur congruis et opportunis negociis fidelium nostrorum cum sacris petitionibus pro commoditate rerum et exaltatione vel stabilitate regni nostri sive efflagitationibus servorum Dei aurem celsitudinis nostre accomodare non differimus et ea que pro utilitate sancte Dei ecclesie sive eorum necessitate nobis indixerint ad effectum usque perduximus ad honorem regni nostri nobis a Deo collati pertinere non diffidimus ac per hoc divinam majestatem nostris excessibus propitiari manifeste credimus Quocirca notum sit omnium sancte Dei ecclesie fidelium atque nostrorum tam presentium quam futurorum magnitudini qualiter vir venerabilis Herimanus Nivernensis ecclesie pontifex celsitudinis nostre adiens clementiam deprecatus est serenitatis nostre potestatem ut preceptum auctoritatis sive electionis vel immunitatis ei fieri juberemus regali celsitudine corroboratum sicut suis antecessoribus Hieronymo et Jone pontificibus insignis prosapia nostra fieri decrevit videlicet avus noster bone memorie invictissimus Augustus et equivocus necnon et genitor noster piissimus imperator germanusque Pippinus devotissime fecerunt per quod res memorate ecclesie firmiter in omnibus mundanis actionibus ac querelis quiete teneri ac defendi legaliter potuissent quod in auctoritatibus predecessorum nostrorum continetur Deprecatus est etiam nostram clementiam super hoc quia memorata ecclesia tempore rebellionis expoliata fuisset rebus et mancipiis ac plene nec ad Dei servitium peragendum amminiculari nec clericis ibidem Deo deservientibus subsidia prebere potuissent insuper partim casu partim incuria sive incendii raptu sive negligentie incultu strumenta cartarum per que res vel mancipia eidem sancte Dei ecclesie conlate fuerunt ea tempestate diversarum cladium quam diximus in eadem perierunt urbe Pro quo nos sancimus sicut avus ac genitor noster decreverunt in suis auctoritatibus ut per hanc nostram firmitatis cartam ita defendi ac teneri res memorate ecclesie possent quasi ipsa strumenta presentialiter adessent Nam postea domnus et avus equivocus noster sicut in auctoritate genitoris nostri continetur ad petitionem Hieronymi quondam ejusdem loci et urbis episcopi pro commercio anime sue ac remuneratione ipsius sancti loci ejusdem ecclesie ex ipsis rebus propriis villas ac cellulas reddidit cum mancipiis vel aliis facultatibus que dudum abstracte inde fuerant quibus et ipse locus melius subsistere potuisset et Dei servitium et sibi suisque successoribus liberius ibidem peragi Postmodum domnus et genitor noster Hludovicus invictissimus Augustus necnon et Pippinus germanus noster auctoritatem gloriosi avi nostri Karoli cum summa auctoritate confirmaverunt et ibi ea que reddidit libenti animo concesserunt et scriptis corroboraverunt et prescripte ecclesie cum omnibus rebus et hominibus ibi juste legaliterque attinentibus per id ipsum sue tuicionis munde burdo defensionis munimine scriptum receperunt Proinde ergo petiit magnificentiam nostram prenominatus vir Herimanus sepe dicte ecclesie presul ut prefatam auctoritatem regaliter stabilientes per nostre mansuetudinis preceptum confirmare denuo dignaremur Nos denique ut divinam super nos in hoc utcumque provocemus misericordiam quod deprecatus est non negavimus sed prompto animo satisque libenter concessimus auctoritatisque hoc scriptum speciali conditione fieri jussimus per quod eas res que antiquitus videntur ad ipsam ecclesiam pertinere et quas avus equivocus noster Hieronymo pontifici reddidit et postea adquisivit et que moderno tempore possidet sive que divina pietas ibi largiendo voluerit augere ei delegantes denuo confirmamus Nostris etiam futurisque temporibus mansurum esse volumus Ut ipse et successores sui quiete teneant sub jure ac potestate nostre firmitatis cum ecclesiastica institutione precipientes atque jubentes ut nullus judex publicus aut quislibet judiciariam exercens potestatem seu ullus fidelium nostrorum tam instantium quam futurorum in ecclesiis aut locis vel agris seu reliquis possessionibus infra ditionem regni nostri quas moderno tempore juste legaliterque possidet in quibuslibet pagis vel territoriis sive ea que deinceps in jure ipsius sancti loci aut per nos aut per alios quoscumque divina pietas largiendo voluerit augere ad causas audiendas vel feoda exigenda aut mansionaticos sive paratas faciendas aut fide jussores alicui tollendos aut canonicos ipsius matris ecclesie seu eorum facultates sive ceteros homines tam ingenuos quam et servos super ipsam terram commanentes vel consistentes vel alios ingenuos qui antiquitus sub defensione ipsius ecclesie constiterunt distringendos vel inquietandos nec ullas redhibitiones aut inlicitas occasiones requirendas nostris neque futuris temporibus ingredi audeat nec a degentibus supra ipsius sacri loci terram quibuscumque ex censu plusquam priscorum usus se habet educere temptet Si que autem cause adversus supradictam ecclesiam fuerint orte canonicos a proprio distringantur episcopo nisi forte criminalis fuerint actionis de quibus est ratiocinandum proprio eorum advocato Sed et quidquid de prefati venerandosi loci rebus fiscus noster exigere poterat eterno pro compendio eidem in integre totum concedimus ecclesie scilicet ut perpetualibus temporibus in stipendiis fratrum inibi Deo famulantium et alimoniis pauperum proficiat in augmentum quatenus pro nostra incolumitate ac regni nostri stabilitate clementissimam Dei miserationem eos in perpetuum exorare delectet Hec vero auctoritatis nostre prescriptio ut meliorem obtineat firmitatem manu nostra eam subscripsimus et ex annulo nostro sigillari jussimus Signum Karoli gloriosissimi regis Jonas notarius ad vicem Hludovici recognovit Data II pridie idus Januarii anno primo indictione quarta regnante Karolo gloriosissimo rege Actum Bituricas civitate in Dei nomine feliciter