Charter Document - 02260104
| Charter Number: | 02260104 |
|---|---|
| Cartulary Title: | Chartes de l'Abbaye de Mores |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1242 |
| Date type: | Internal, A.D. |
| Resource Link(s): |
|
Charter:
Ego Nicolaus Dei gratia abbas Belliloci totusque ejusdem loci conventus Premonstratensis ordinis Trecensis diocesis notum facimus presentibus et futuris quod cum discordia esset inter nos ex una parte et viros religiosos abbatem et conventum de Moris ex altera et diu esset inter partes litigatum in curia nobilis domini Girardi domini de Durnaio super eo quod ab ipsis petebamus unum sextarium frumenti ad Crole quod sextarium dicebamus nos habere et diu percipiebamus in grangia ipsorum de Billefeurre Morensibus e contrario respondentibus et dicentibus quod nos injuste investiti eramus de dicto sextario cum nec ab ipsis Morensibus nec a quoquam monumentum ad hoc nos habuissemus tandem bonorum virorum utentes consilio eisdem Morensibus in pace dimisimus et sine aliqua reclamatione libere et absolute quictavimus sextarium antedictum ita quod ipsi Morenses dederunt nobis et ecclesie nostre in recompensationem sepe dicti sextarii IX libras et X solidos in pecunia numerata Nos vero sepe dictis Morensibus dictum sextarium quictavimus et quictamus in perpetuum ut ipsi habeant et ipsum possideant pacifice et quiete Actum anno Domini MCCXLII mense februario