Charter Document - 02250021

A tous ceulx qui ces præsentes lettres verront frère Bertrand Figeat licencié en loys chanoine de Saint Satur garde du seel furent pour ce personnellement establiz Jehan Denis et Gillebert Machebeuf demorans à Mève sur Loire ont reconneu avoir vendu à reverend père en Dieu Mr Estienne Julian humble abbé dudit Saint Satur de l'ordre Saint Augustin au diocèse de Bourges ad ce present stipulant et y aquestant pour luy sadite esglise et abbaye dudit Saint Satur et successeurs abbez et les aians de luy le temps advenir tuit les heritaiges cy apprès declarés une maison avec ses appartenances et deppendances assises audit lieu de Mève près le petit molin et la rivière par où l'on va dudit petit molin en la grant rue de Poilly et juxte à la rue par où l'on va tout du long en Borneuf laquelle maison et appartenances d'icelle fut à Chinon Item une pièce de terre contenant huit boisselées ou environ assise en la bouche du Mazo juxte au grant chemin par lequel l'on va de Mève à Poilly d'une part d'autre part au curé dudit lieu de Mève d'aultre part à la rue Bourneuf [] pour et parmy le pris et somme de treze livres tournois de bonne monnoye aiant à present cours [] promectans lesdits Jehan Denis et Gillebert Machebeuf vendeurs et chascun d'eulx par leur foy pour ce donnée et bailliée corporellement en la main dudit juré comme jamès contre ces præsentes lettres de vente quittance et transport perpetuel et les chouses contenues en ces lettres ilz ne viendront [] en paiant par ledit reverand achapteur et ses successeurs xl sols tournois de rente annuelle et perpetuelle à Marguerite de Latour de la paroisse d'Erry chacun an le jour et feste de Saint Michel avec les cens et charges sinon en seront dechuz [] En tesmoin desquelles nous avons mis et appousé à ces præsentes lettres ledit scel de ladite prevosté de Saint Satur Donné le unziesme jour d'avril l'an mil quatre cens soixante et quinze après Pasques