Charter Document - 02250019

A touz ceulx qui ces præsentes lettres verront Jehan de la Grange licencié bailly de Saint Satur Savigny Belleville Corjohan et Mève pour messires les religieux abbé et couvant de Saint Satur seigneurs temporels desdits lieux salut Comme plait et procès feust meu et esperé de mouvoir plus grant entre mesdits seigneurs abbé et couvant ou leur procureur pour eulx demandeurs d'une part et les bourgois manans et habitans dudit lieu de Mève deffendeurs d'autre part sur ce que lesdits religieux disoient et proposoient que à cause de la dottacion et fondacion de leur esglise de Saint Satur ilz avoient droit et estoient vrays seigneurs temporelz proprietaires et possesseurs de ladicte ville et terre de Mève ainsi qu'elle se comporte et seigneurs des hommes et femmes demourans en ladicte terre amortiz de nos sains pères les papes et Roys de France de tel et si loncg temps qu'il n'est memoire du commancement ne du contraire et en icelle terre de Meve y avoient et ont toute justice haulte moyenne et basse cens censives et plusieurs autres droiz et devoirs qui leur estoient et sont eschuz de toute ancienneté de leurs dits subgetz manans et habitans et demourans en icelle ville de Meve entre lesquelz droitz et devoirs avoient et ont droit et sont en bonne possession et saisine de tout temps que chascun des manans et demourans tenans feu lieu et mesnaige audit lieu de Mêve leur estoient et sont tenus paier en trois ans une fois ung don bon et convenable selon la faculté et puissance d'ung chascun d'iceulx excepté et réservé ceulx qui sont clercs tonssurez lesquels ne doyvent riens dudit don tant qu'ils demeurent en ladicte franchise et il soit ainsi qu'il est eschu ausdits demandeurs pour occasion dudit don les arrerages de plusieurs années tant du temps que la guerre a eu cours comme depuis la paix faicte entre le Roy nostre sire et nos seigneurs et combien que de leur paier lesdits arreraiges eussent lesdits habitans qui de present sont esté sommez et requis dont ilz avoient esté et encores sont reffusans contredisans et en demeure et pour ce les avoient fait adjourner pardevant nous ou nostre lieutenant audit lieu de Meve et fait conclusions et requestes que à leur paier lesdits arrerages dudit don en l'extimacion de soixante livres tournois ou avec telle somme que de raison seroit et à continuer ledit payement dudit don en trois ans une fois feussent lesdits habitans qui à present sont et qui ou temps avenir seront condempnez et contrains et s'ilz le nyoyent lesdits demandeurs offroient de prouver tant et si avant que leur souffiroit pour leur entencion avoir et ottenir [] Et de par lesdis habitans fut dit et deffendu au contraire disans que se don avoit esté fait et octroyé ou temps passé par leurs predecesseurs habitans d'icelle à iceulx demandeurs ce auroit esté par deux ou par trois foiz et en cas de necessité que lesdis demandeurs avoient à faire pour l'aulmentacion et acroissement de leur ditte esglise or n'en avoient ilz nul besoing car Dieu mercy leur dicte esglise rentes et revenues d'icelles estoient en bon et souffisant estat selon le temps qui a coru mesmement comme à l'occasion de la guerre lesdis habitans avoient esté destruiz diminuez et essillez de leur dicte ville en telle manière qu'ilz avoient perdu tout le leur et leurs chevances et que la pluspart desdis habitans estoient mors et les autres alez demourer en estranges pays et n'estoient lesdiz habitans qui à present sont que nouveaulx venuz et depuis ladicte guerre par quoy des droiz desdis demandeurs ne povoient riens savoir et n'en avoient nulle cognoissance finablement pour paix et amour norrir et eschever toute matière d'acord pardevant nous en jugement icelles parties en la manière qui s'ensuit c'est assavoir Simon Chauveau Robert Chauveau frères Jehannot Acqueneau Jehannot Mathelin Perrot Mesgrot Symon Acqueneau André d'Orléans Jehannot d'Orléans Martin d'Orléans Robert Passereau Jehan Mandevant Jehan Gergaut Jehan le Norment Perrin Totée faisans et represantans la plus grant et la plus saine partie desdis habitans dudit lieu de Mêve et eulx faisans fors pour les autres absans d'icelle ville presens et avenir soubz le lien et obligacion de tous les biens communs et particulliers d'icelle ville en ceste manière c'est assavoir afin qu'ilz soient participans et acompaignez ès bienfaiz prières et oroisons qui jour et nuyt seront faiz en ladite esglise de Saint Satur qu'ils payeront et ont promis paier chascun mesnaiger doresnavant a tousjours perpetuelment en trois ans une foiz ausdits religieux demandeurs selon leur puissance et faculté desdis habitans et commancera le premier payement à la feste saint Michel prochain venant et ainsi doresnavant en trois ans une foiz continuelment selon leur dite faculté et puissance saulve et reservé les clercs lesquelz ne sont ne ne seront en riens compris en ce present adcort tant qu'ils seront en ceste franchise et sont et demeurent quittes lesdis habitans presens et avenir des arrerages que lesdis demandeurs leur demandoient jusques a huy Et promisdrent et promettent icelles parties c'est assavoir chascune partie en tant qu'il lui touche et peult toucher par stipulation solempnel et par convenance expresse et par leurs foy por ce corporelment baillées en nostre main que jamès contre les choses dessusdites ou aucunes d'icelles ilz ne viendront à l'encontre ne venir feront en aucune manière ou temps avenir ainçois les ont et auront agreables les tiendront fermes et estables à tousjours sans les corrompre en aucune manière ou temps avenir sur peyne de rendre et restituer l'une partie à l'autre partie et aux siens tout coustz predes mises interetz domaiges et despens qui fais et soustenus seront par deffault de accomplissement des choses dessusdites et de chacunes d'icelles Fait et puis tenus audit lieu de Meve par nous bailly dessusdit et pour plus grant approbacion des choses dessusdites nous avons requis à honnorable homme maistre Estienne de la Bertanche licencié en lois garde des sceaulx de la conté de Sancerre de mectre et apposer ledit scel à ces præsentes leitres Fait et donné le mardy septiesme jour du mois de juing l'an mil quatre cens quarante et six