Charter Document - 02240100
| Charter Number: | 02240100 |
|---|---|
| Cartulary Title: | Cartulaire de Saint-Vincent de Mâcon |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 0894 |
| Date type: | Internal, Regnal |
| Resource Link(s): |
Archives départementales de Saône-et-Loire - G 198 (p.43) TELMA - Chartae galliae TELMA - Chartae galliae |
Charter:
In nomine Domini Dei eterni et Salvatoris nostri Jesu Christi Odo clementia Dei rex si ea que nostri inter se fideles loci temporisve commoda opportunitate ex rebus propriis aut jure beneficiis sibi commissis causa augmenti vel meliorationis juste ac legaliter agendum deliberaverint nostris confirmamus edictis regie nimirum celsitudinis morem persequimur idque ad regni nobis divinitus collati tutelam proficere non dubitamus Ergo cunctorum sancte Dei ecclesie fidelium nostrorum tam presentium quam et futurorum solertia noverit quia adiens nostre presentiam serenitatis Franco venerabilis episcopus sancte matris ecclesie Nevernensium que constructa ac dicata noscitur in honore ac nomine preciosi martiris Christi Cirici humiliter petiit ut quamdam precariam quam cum Roccone fidele nostro cum assensu fratrum Christo inibi militantium ex rebus jam dicti Sancti Cirici Sanctique Martini fecerat precepto nostre eminentie confirmare dignaremur Suntque autem he res quas jam dictus Franco episcopus memorato Rocconi dat in pago Matisconensi in villa Fisciaco de potestate Sancti Cirici mansos IIII vestitos cum terra apsa ad ipsam potestatem in eadem villa aspiciente et in villa Ciciaco mansos duos vestitos in villa quoque [] de potestate Sancti Cirici mansos III apsos de rebus Sancti Genesii eque mansos III apsos in pago etiam Nivernensi in villa Dulon ex rebus Sancti Franconei mansos IIII apsos vero de potestate Sancti Aniani mansos III apsos et in pago Cabilonensi villa Cacenato de rebus Sancti Cirici mansos IIII apsos de ratione vero Sancti Martini in villa Montis ecclesiam cum mancipio uno terramque ad ipsam pertinentem [] Pro hac vero rerum prestaria concessione confert prefatus Rocco suprascripte matri ecclesie ex rebus propriis in pago Matisconensi in villa Colonias mansum I et in Luviniaco mansum I eo jure ut tam ipse quam ejus conjux Guarva eorumque infantes Raculfus scilicet et Leutrada usu fructuario in sua habeant vita annisque omnibus in festivitate Sancti Martini solvant rectori sancte ecclesie prescripte pro censu solidos decem postque eorum decessum utreque res [memorate] meliorate revertantur cum omni integritate ad potestatem Sancti Cirici Faventes itaque libentissime precibus memorati episcopi hoc nostre sublimitatis preceptum fieri jussimus per quod precipimus atque jubemus ut istam dispositionem prescripti episcopi sepe dictus Rocco cum uxore et nominatis infantibus ascriptas res salvo per omnia jure ecclesiastico teneat atque usu fructuario possideat Et ut hoc nostre auctoritatis preceptum validius in Dei nomine per tempora supervenientia subsistere valeat manu ipsum propria subter firmavimus nostroque annulo sigillari jussimus Signum Odonis gloriosissimi regis Data V idus julii indictione XII anno VII regnante Odone gloriosissimo rege