Charter Document - 02221523

Nos Giles per la grace de Deu arcevesque de Nerbone Pierre evesques d'Aceurre et Jehans evesques de Myaux faisons savoir à touz que come nobles hons Jehans de Chalon sires d'Allay fust hons lieges devant touz autres à noble baron Othe conte palatin de Bourgoigne et signour de Salins par ansi con lidiz Jehans le disoit et lidiz Othes pour ce especialment estaubliz en nostre presence de sa propre et franche volunté a volu outroié consenti et comandé adit Jehan que lidiz Jehans pour luy et pour les suens permaignablement entroit en l'omaige et en la feauté lige de très excellanz prince Philippe per la grace de Deu roy de France et a quitté lidiz Othes pour luy et pour les suens adit Jehan et es suens toute la liegece de laquele lidiz Jehans estoit hons adit conte sau ce toutevoies pour ledit conte et pour les suens que lidiz Jehans pour lui et pour les suens demore de fié plains hons adit conte des choses qu'il tenoit ligement doudit conte Et pour ce lidiz Jehans de l'exprex comandement doudit conte et pour certaines rentes que lidiz roys a doné adit Jehan est entrez lidiz Jehans en l'omaige lige doudit roy et a promis lidiz Jehans audit roy feauté et leauté contre touz et avant tout autres qui puent vivre et morir Encour est à savoir que lidiz cuens a volu et outroié que toutes les covenances que li devantdiz cuens Othes et ses peres et sa mere ont à devantdit Jehan à son pere et à sa mere qu'eles soient tenues gardées et acomplies à luy devantdit conte et adit Jehan par ansi come lesdites covenances sunt contenues es estrument sur ce fait Et a supplié et requis lidiz cuens adit roy que lesdites covenances face tenir et garder adit Jehan si avant con raison et mesure l'aportera En tesmoignaige de laquel chose à la requeste desdites parties avons mis noz seaux en ces presentes lettres faites et donées à Saint Germain en Laye le mecredi devant la saint Lorent l'an Nostre Signour corrant per mil trois cenz et doux