Charter Document - 02220642

Nous Evrars et Willermins diz Grillonz ses freres fiz çay en arriers Estevenet diz d'Usyes faisons savoir à touz que nous ne deceu ne baraté en acune chose mais de nostre propre bone volunté et pour nostre profit et par le loux et par la volunté mons Raat de Ceys chevalier nostre signour lyge de cui nous tenons quanque nous avons ligement avons vendu quitté outroié et delivré à touzjours mais à noble baron mons Jehan de Chalon signour d'Allay et à ses hoirs un chasal assis en la ville de Mellant selon la maison Perrot dit Chaistron un autre chasal assis selon la maison dit Loriot une fachié de prel assise selon le pré à Mareschaut de Septfontaines d'une part et le prel Nycolin de Sarras d'autre et seze jornaux de terre arable assis ou finaige de Mellant desquex li dui des jornaux sunt assis sus le quartier de Soicherons d'une part et la terre Perrot le Rasorier d'autre un autre jornal assis selon la terre à Lostalier [d'une part] et la terre à Saint d'autre un jornal selon la fontaine des Cherrieres d'une part et le prel Haymonz à Fevre d'autre un jornal à fontainne Perron selon la terre Lambert de Refranche d'une part et la terre mons Perron de Buyres d'autre deux jornaux es prel d'Artise selon la terre mons Jehan de Claron chevalier d'une part et selon la terre mons Pierre de Buyres d'autre un jornal selon la terre mons Pierre de Buyres d'une part et la terre à la fame Aymonin à la Pancote d'autre un jornal en la combe Mellant selon la terre à Poicholier d'une part et selon la terre Hugue diz Mellant d'autre un jornal es Colunges selonc la terre Nicolin Goillier d'une part et la terre à Saint d'autre un jornal es champs d'Enchers selon la terre à chestelain de Monmaour d'une part et la communax de la vile de Mellan d'autre doux jornaux ou Coudroy selonc la terre dame Nycole d'une part et la terre Marguerite d'Ornens d'autre une piece de terre selonc la terre à Dorre d'une part et la terre Aymonin à fil Renaut d'autre un jornal en la Bataille selon la terre Merguerite d'Ornens [d'une part] et la terre Hugonin Mellant d'autre un jornal en doues pieces assises en combete Erno selon la terre Saint Vincent d'une part de l'une des pieces et la terre à Lostalier de l'autre li autre piece est selon la terre à Pautier d'une part et la terre Besençon à frere Bocart d'autre doux jornaux à pomier des Rues d'une part et la terre à maire de Ceys d'autre et un jornal selon le pré Raout d'une part et la terre Ravenel d'autre et toutes autres choses que nous avons ne poons ne devons avoir ne reclamer ne chalongier ou terretoire de Mellant c'est à savoir en pré en champs en bois en chasaux en curtiz en chenevieres en terres arables et non arables pour douze livres d'estevenens bons et loiaux lesquex nous avons eu et receu en bons deniers bien nombrez et nous en tenons por bien paiez de tout en tout et sunt tornées lesdites douze livres en nostre grant profit En tesmoignaige de laquel chose nous lidiz Evrars et lidiz Vuillemins avons requis et fait metre en ces letres le seaul mons Raat de Ceys chevalier de cui nous tenons en fié les choses dessusdites Faites et donées l'an Nostre Signour mil CC quatre vint et dix ou mois de marz