Charter Document - 02220641

Je Girars de Nuefchestel chevaliers cognestable de Bourgoigne fais savoir à touz que je ay vendu quitté et baillié à noble dame Lore contesse de Bourgoigne et dame de Salins et à ses hoirs tout quanque je avoie et devoie avoir à Esterno c'est à savoir Largylley et son meis Costier le fil Bonain et son mès Jordain le fiz mons Robert et son mès Jehannin son frere et son mès Paris son frere et son mès Lambelin le fiz Pomant et son mès Virret son frere et son mès et quanque je avoie et devoie avoir à Refranche c'est à savoir le Prevost et son mès Estevenin son fil et son mès Arembourt et son mès Haymonin et son mès Bovillart et son mès le fiz Perrunin et son mès Besençon et son mès et quanque je avoie et devoie avoir à Colens et à Amancey c'est à savoir Estevenins le fi Espulietain et son mès Perron Dou Pré et son mès la Varonde et son mès le mès Poncier la fame Estevenin Dou Pré et son mès Robert son fillaitre et son mès Henryon Dou Prel et son mès les corvées d'Amancey et de Fertens et ce que je avoie et devoie avoir en la forest d'Amancey en prel en champ et en autres choses et quanque je avoie et devoie avoir à Fertens c'est à savoir Perrin le fiz à la Parole et son mès Renaut son frere et son mès Guillemin son cousin et son mès et ce que je avoie et devoie avoir à Emondens c'est à savoir le Grenetier et son mès les mès Oudet à Venour Thomas le fiz à la Belorce et son mès Willeret le Torneour et son mès Besençon le Gros et son mès et quanque je avoie et devoie avoir à Claron c'est à savoir le Conte et son mès Henryon son frere et son mès Perrenin le fiz Watier et son mès le patronaige de ladite ville de Claron et un chasal assis ou chestel de Cey devant la maison mons Raat et une vigne assise dessoz ledit chastel delez la vigne mons Jacon de Clairon et Jehannin le fiz Jaquete de Ceys Et ay vendu quitté baillié à lad contesse quanque je avoie et devoie avoir à Montaigney et à Arbois sau ce que je ay [à] Arbois de part la cognestaublie qui est de part ma fame que je retien à moy et es miens Et ay encor venduz et baillié à ladite contesse tout quanque je avoie et devoie avoir dois la riviere de Loueu tanque à Poloingney en pré en champ en bois en revieres en jostises en signories en usaiges et le droit que je avoie et devoie es fruicteries et en autres choses quelques choses que ce soient et en quelques leus des devantdiz leus que elles soient ou autre part dois ladite reviere de Loueu tanque à bourc doudit Poloingney et le fié mons Odon de Lielle le fié mons Vachier à Put le fié mons Renaut de Saint Coyntin le fié mons Vuillaume de Fertens et le fié Jehannin de Mellens qui estoient mui homes lige pour sat cenz livres trente livres moins d'estevenens bons et leaux lesquex je ay receu de ladite contesse en deniers nombrez et m'en tien pour bien paiez En tesmoignaige de laquel chose je ay mis mon seal pendant en ces presentes lettres et à ma priere et à ma requeste li chapitres de Saint Anathoile et de Saint Michiel et de Saint Morise de Salins ont mis lour seaux pendant en ces presentes lettres ensamble le mien Ce fut fait l'an de l'incarnation Nostre Signour qui corroit par mil et CC sexante et trois ou mois de marz