Charter Document - 02220637

Nous Girars de Voitours chenoine de Goille procurour de religiouse persone et honeste Anselme abbé de cel leu ou nom doudit abbé et come ses procurours et tout li covenz doudit leu de Goile en nostre non faisons savoir à touz que nous havons baillié quitté et outroiez à touzjours mais senz rapeler pour nous et pour noz successours en nom que dessus à très haut home et puissant mons Hugue de Chalon signour d'Allay et es siens tout le droit et toute la raison que nous ou nom de nostre eglyse de Goile havons et poons havoir es homes de By et d'Eschay en lour mex et lour tenement liquex home furent de nostredite yglise de part mons Hugon dou Chambenot chevalier de Salins çay en arriers Encores li quittons et avons quittey touz le chalonge les griez et les domaiges esquelx il et très noble bers messires Jehans de Chalon cui Dex absoille estoient tenuz à nous et à nostre yglise por raison de la moitié de noz vignes de Royante de doux cintes en Valieres de cinc solz de cens sus nostre maison dou Chambenou que messires Pierres d'Estavayez et dame Jehanne sa fame en hont porté sus nos par le deffaut doudit mons Jehan Et ceste quittance nous avons fait pour quarante solz d'estevenens de rente perpetuel que lidiz Hugues nous a assigney à panre et à recevoir chescun anz sus la rente de la salnerie de Salins le jour de la nativitey saint Jehan Baptiste En tesmoignaige de verité nous lidiz covenz qui tesmoingnons ledit Girart estre veray procurour doudit abbé pour nous pour luy et à sa requeste avons mis nostre seal pendant en ces presentes lettres Doné l'an Nostre Signour corrant par mil CCC et seze ou moy de may