Charter Document - 02220625

Nous officiaux de la court de Besençon faisons savoir que nobles hons et poissanz messires Hugues de Chalon chevaliers sires d'Allay d'une part et dame Katherine de Jonvile dame d'Andelot d'autre part lesdites parties ont fait et acordey entre lour per devant nostre comandement les eschanges et permutacions cy dessoz escriptes en la forme et en la maniere que s'ensuet c'est à savoir que ladite dame Katherine pour li et pour ses hoirs a baillié delivré et outroyé baille delivre et outroie en nom d'eschange et de pure et veraie permutacion adit Hugue pour luy ses hoirs et cex qui cause auront de luy franchement et d'aluef senz fiez senz rierefiez et senz touz autres servitut quex que elle soit et coment que on la puisse appeler Varennes le chestel les appartenances les apendises doudit leu les homes més taillables et censers signories hautes et basses mere et mixte empere juridiction simple cohercion fiez rierefiez prez bois champs molins pasquiers aigues cours d'aigues et generalment tout ce que elle ha puet et doit havoir esdites choses en quelque maniere que ce soit et comment que [l'on] la puisse appeler et auximent tout ce que elle a puet et doit havoir à Cuseal es appartenances appendises et en toute la chestellenie de Cusel pour raison de son heritaige en quelque maniere que ce soit et comment que on la puisse appeler franchement d'aluef senz fiez senz rierefiez et senz toute autre servitut que l'on puisse et doye reclamer es choses dessusdites pour sexante et cinc livrées de terre à estevenens que lidiz Hugues pour luy et cex qui cause hauront de luy doit asseoir etassigner à ladite Katherine et à ses hoirs bien et loialment et franchement autre part en la terre doudit Hugue pour lesquex sexante et cinc livrées de terre dessusdite[s] que lidiz Hugues doit asseoir en heritaige à ladite Katherine lidiz Hugues pour luy les siens et ces qui cause hauront de luy ay baillié delivrey et outroié baille delivre et outroie à ladite Katherine et es suens et à ces qui cause auront de li franchement et d'aluef senz fiez senz rierefiez et senz toute autre servitute quel qu'elle soit les viles de Doy et dou Cherbonoy assises ou val de Miges ensamble les appartenances appendises desdites viles les homes més taillables et censers desdites villes signories hautes et basses mere et mixte impere juridiction simple cohercion prez champs fours et le molin que l'on appele le molin Dam Jehan et generalment touz ce que lidiz Hugues ha puet et doit havoir esdites choses en quelque maniere que ce soit et coment que l'on la puisse appeler retenuz adit Hugue pour luy et pour les suens tant soulement le mex Benoitet dou Cherbony ensamble les appartenances et appendises doudit mex Et a voluz et outroié li diz Hugues pour luy ses hoirs et cex qui cause auroient de luy et convenanciez et acordey est entre lesdites parties que lidiz homes de Doy et dou Cherbony et li habitanz esdiz leux haient et doient havoir lour usaige es bois et es jours c'est à savoir en l'une et en l'autre jour en la maniere que li homes dou val de Miges hont acostumé de havoir lour usaige esdiz bois et jours ce ajosté toutevoie que se lidiz Hugues sui hoirs et sui successeurs destorboient empachoient ou deffendoient esdiz homes dou val de Miges lour usaige desdiz bois et desdites jours en la maniere que il y hont acostumey de user lesdiz homes de Doy et dou Cherbony et li heritanz esdiz leux non obstant ladite deffense et empachement hauroient touzjours et devroient avoir lour usaiges esdiz bois et esdites jours en la maniere qu'il hauroient heu et acostumey devant ladite deffense et empachement Encor est à savoir et acordez est entre lesdites parties que se acuns estoit pris arestez et detenuz esdites viles de Doy et dou Cherbony ou es appartenances d'ycelles qui heust mort desservi ladite dame Katherine sui hoirs et sui successours ne le porroient ne devroient justisier ne faire justice ou val de Meges ne lever justice oudit val mais le devroient justisier ou faire justisier à Andelot ou autre part en sa terre lay où lour plera Encor est acordez et convenanciez entre lesdites parties et à ce expressement s'est consentie ladite Katherine pour li et pour ses hoirs que lidiz homes dou Doy et dou Cherboni et li heritanz esdiz leus sunt et doivent seront et devront estre tenuz à garder aidier et deffendre ledit val de Miges et les pas d'yceluy par temps de guerre Et est à savoir que cil de Doy dou Charbony et de Morenant et li heritanz esdiz leus sunt tenuz et doivent venir muedre adit molin Dam Jehan et se il aloient moudre autre part que adit molin Domp Jehan lidiz Hugues sui hoirs et sui successours seront tenuz et devront faire paier à chescune persone desdiz leus qui yroit moudre autre part qu'adit molin Damp Jehan à ladite Katherine et à cex qui cause auroient de li trois souz de esmende Et toutes ces choses Et nos lidiz officiaux en tesmoignaige des choses dessusdites à la priere et à la requeste desdiz Hugue et Katherine avons mis le seal de nostre court de Besençon en ces presentes lettres ensamble les granz seax desdiz Hugue et Katherine Et nous lidiz Hugues et Katherine qui cognoissons et confessons toutes les choses dessusdites et une chescune d'ycelles come dessus sunt escriptes et devisées estre veraies avons mis noz grant seal pendant en ces presentes lettres ensamble le seal de ladite court de Besençon en tesmoignaige de verité Faites et données le londi après feste saint Vincent l'an mil CCC dix et huit