Charter Document - 02220620

Je Perrins de Malarée escuiers fais savoir à touz que je confesse et en verté recognoisse estre hons de noble baron et puissant c'est à savoir mons Hugue de Chalon signour d'Allay et confesse tenir en fié de luy les choses cy après devisées et escriptes assises ou terretoire de Montagu et de Lons c'est à savoir le diesme de Pillim des vignes et des champs item en cest meisme leu de Pillin un champ franc de disme et de touz autres servituz et contient quatre poses de terre item en cel meisme leu un champ franz de disme et de touz autres servituz et dure dois l'un des Malpas tanque à l'autre entre le biez et le chemin et contien bien quatre poses item les Plantes dessus ledit leu et la terre plaine quars et dismes en huit poses c'est à savoir cinc poses en vigne et trois en terre plaine item es plantées dou Boichat quars et dismes bien en six poses de vigne item en cest meisme leu le disme de la vigne Jehan Larnot item le quart et le disme de demi pose de vigne qui siet en Pillim item dessus celi vigne le disme en la vigne mons Guillaume Forroul prevoire item la cense sus doues poses de terre qui est es hoirs Moignon item demi les quars de Chambolan que Guinaçons tient de moy à cense item un cultiz à Lons delez le byez de Vaissel item un chasal à Lons assis devant chiez Brochet en la rue es Juys item une vigne à Lons vers la maison de Cyteax Et pour ce lidiz Hugues m'a doné et paié cinquante livres d'estevenens desques je me tien bien pour paiez aquel Hugue mon bien amé seignour je promet fealté come vassal doit à son seignour et par mon soirement doné corporelment sus sains ewangiles En tesmoignaige de laquel chose je ay prié et fait metre en ces lettres le seal de la court le conte de Mombeliart douquel l'on use à Lons Ce fut fait et doné presenz mons Jehans Le Bois chevalier mons Gile de Montagu curé de Clerevax et Salongret escuiers le sambadi après la feste saint Nycolax d'yver l'an Nostre Signour corrant par mil trois cenz dix et sept